19 снежня, Мінск /Кар. БЕЛТА/. У бліжэйшыя тры гады БелАЗ максімальна аўтаматызуе вытворчасць, паведамілі БЕЛТА ў прэс-службе прадпрыемства.
Будуць укаранёны найноўшыя тэхналогіі і прагрэсіўнае абсталяванне з максімальнай аўтаматызацыяй і мінімальным уплывам чалавека на канчатковы вынік. У іх ліку робататэхнічныя комплексы расійскай вытворчасці для зваркі рам кар'ерных самазвалаў грузападымальнасцю 220-240 т, каардынатна-прабіўны прэс для вырабу дэталей з вялікай колькасцю адтулін з ліставога матэрыялу любой канфігурацыі, устаноўка для размагнічвання лістоў, якія выкарыстоўваюцца пры вытворчасці платформ кар'ерных самазвалаў, шматінструментальная тэхналогія шліфавання дэталей для кар'ерных самазвалаў грузападымальнасцю 90-240 т, тэхналогія афарбоўвання 2К-матэрыяламі з ачысткай адпрацаванага паветра цэалітавымі ротарнымі ўстаноўкамі і падрыхтоўкай паверхні да афарбоўвання дэталей і вузлоў самазвалаў (комплекс створыць магутнасці па афарбоўванні дэталей і вузлоў машын вялікай і асабліва вялікай грузападымальнасці і спецтэхнікі на ўзроўні лепшых сусветных аналагаў) і г.д.
Мяркуецца, што найноўшае абсталяванне і тэхналогіі дадуць магчымасць павялічыць аб'ёмы вытворчасці, павысіць якасць прадукцыі і знізіць працаёмкасць аперацый.
ААТ "БелАЗ" - кіруючая кампанія холдынга "БелАЗ-Холдынг" - найбуйнейшы сусветны вытворца кар'ерных самазвалаў і транспартнага абсталявання для горназдабыўной і будаўнічай прамысловасці. Займае каля 30 працэнтаў сусветнага рынку кар'ерных самазвалаў асабліва вялікай грузападымальнасці. Вырабляе самы буйны ў свеце кар'ерны самазвал грузападымальнасцю 450 т.-0-
