24 студзеня, Мінск /Кар. БЕЛТА/. Інструкцыя аб парадку вырабу пашпарта невыкарыстоўваемага аб'екта зацверджана пастановай Дзяржаўнага камітэта па маёмасці ад 6 студзеня 2023 года нумар 2, паведамляе БЕЛТА са спасылкай на Нацыянальны прававы інтэрнэт-партал.
Указам ад 19 верасня 2022 года нумар 330 устаноўлена, што ў выпадку немагчымасці складання падагульняючых тэхнічных дакументаў адносна невыкарыстоўваемай маёмасці ў выніку яе фізічнага стану яна будзе ўключацца ў абарот на падставе адпаведнага пашпарта.
Пашпарт вырабляе тэрытарыяльная арганізацыя па дзяржрэгістрацыі нерухомай маёмасці, правоў на яе і здзелак з ёй па месцы яе знаходжання. Работа вядзецца на падставе дагавора падраду, заключанага з прадаўцом дзяржаўнай маёмасці або маёмасці, што знаходзіцца ва ўласнасці гаспадарчых таварыстваў, ці з дзяржаўным органам або арганізацыяй, якія ажыццяўляюць перадачу дзяржмаёмасці.
Работы па вырабе пашпарта аплачвае прадавец (перадаючы бок), калі іншае не ўстаноўлена заканадаўствам. Пашпарт вырабляецца па выніках абследавання фактычнага стану невыкарыстоўваемай маёмасці, яе састаўных элементаў і прылад у натуры. Праводзіцца візуальны агляд з абавязковым фатаграфаваннем, а таксама вымярэнні інструментамі і прыборамі, якія забяспечваюць дакладнасць не ніжэй за 0,01 м. Пры гэтым вымярэнню падлягаюць толькі знадворныя контуры аб'ектаў.
Вынікі абследавання фактычнага стану невыкарыстоўваемай маёмасці ўносяцца ў абрыс і пазначаюцца з дакладнасцю да 0,01 м. Пашпарт вырабляецца на папяровым носьбіце па ўстаноўленай форме ў двух экзэмплярах: адзін выдаецца прадаўцу (перадаючаму боку), другі захоўваецца ў тэрытарыяльнай арганізацыі.
Калі патрабуецца ўнясенне змяненняў і выпраўленне памылак, то складаецца новы пашпарт невыкарыстоўваемага аб'екта.
Пастанова ўступае ў сілу з 22 сакавіка 2023 года.-0-
