У Беларусі ўдасканальваюць сістэму электроннай пашпартызацыі тавараў
 

11 лістапада, Мінск /Кар. БЕЛТА/. Урад Беларусі зацвердзіў змяненні, накіраваныя на ўдасканаленне сістэмы электроннай пашпартызацыі тавараў, падпісана адпаведная пастанова. Аб гэтым паведамілі БЕЛТА ў прэс-службе ўрада.

Пастановай у мэтах далейшай лічбавізацыі лагістыкі, гандлёвых і кантрольных працэдур удасканалены парадак функцыянавання міжведамаснай размеркаванай інфармацыйнай сістэмы "Банк даных электронных пашпартоў тавараў" (ePASS). Банк з'яўляецца першакрыніцай даных аб таварах як вырабленых у Беларусі, так і тых, што паступаюць у гандлёвыя сеткі краіны па імпарце.

"Прыняцце пастановы павысіць якасць і дакладнасць інфармацыі ў міжведамаснай размеркаванай інфармацыйнай сістэме, якая штодзённа папаўняецца на дзясяткі тысяч новых найменняў тавараў, дасць магчымасць аднастайна выкарыстоўваць апісанні тавараў у сістэмах вытворцаў, гандлю, транспарту і іншых суб'ектаў розных галін, што вядуць таварны ўлік. Гэтыя апісанні будуць даступны як органам кіравання, так і простым грамадзянам-пакупнікам на аснове бясплатных мабільных дадаткаў, якія забяспечваюцца агульнадаступнымі сэрвісамі банка праз інтэрнэт", - адзначылі ў прэс-службе.-0-