У Беларусі ў жніўні зафіксаваны максімальны з пачатку года прырост тэрміновых рублёвых дэпазітаў насельніцтва

30 верасня, Мінск /Кар. БЕЛТА/. У Беларусі ў жніўні 2024 года зафіксаваны максімальны з пачатку года прырост тэрміновых рублёвых дэпазітаў насельніцтва. За месяц яны павялічыліся на Br292 млн, склаўшы на 1 верасня Br9,7 млрд. За 8 месяцаў гэтага года названыя дэпазіты выраслі на Br1,7 млрд. Аб гэтым сведчаць даныя, апублікаваныя на сайце Нацыянальнага банка, паведамляе БЕЛТА.

Рост тэрміновых рублёвых дэпазітаў насельніцтва ў асноўным забяспечаны за кошт доўгатэрміновых банкаўскіх укладаў, па якіх банкі прапануюць прывабныя ўмовы. Так, сярэдняя працэнтная стаўка па новых рублёвых безадзыўных укладах фізічных асоб на тэрмін звыш аднаго года ў жніўні 2024 года склала 13,46 працэнта гадавых. Пры гэтым асноўны аб'ём дэпазітаў быў прыцягнуты банкамі на тэрмін ад 1 года да 2 гадоў па сярэдняй стаўцы 13,5 працэнта гадавых.

Прадаўжаецца дэвалютызацыя зберажэнняў насельніцтва. Тэрміновыя валютныя дэпазіты фізічных асоб у жніўні зменшыліся на $45 млн, склаўшы на 1 верасня $2,6 млрд. За 8 месяцаў гэтага года названыя дэпазіты скараціліся на $364 млн.

Як вынік, доля тэрміновых рублёвых дэпазітаў насельніцтва стала пераважнай у агульным аб'ёме ўсіх тэрміновых дэпазітаў фізічных асоб. Так, калі на пачатак года тэрміновыя дэпазіты насельніцтва ў рублях складалі 45,9 працэнта, у валюце - 54,1 працэнта, то на 1 верасня доля рублёвых дэпазітаў вырасла да 53,9 працэнта, валютных - скарацілася да 46,1 працэнта.-0-