20 красавіка, Мінск /Кар. БЕЛТА/. У Беларусі разглядаюць два пакеты мер па падтрымцы ва ўмовах пандэміі. Аб гэтым паведаміў міністр эканомікі Аляксандр Чарвякоў на сустрэчы з прадстаўнікамі бізнес-асацыяцый, паведамляе БЕЛТА са спасылкай на сайт Мінэканомікі.
Міністр эканомікі праінфармаваў, што праект указа аб падтрымцы эканомікі ва ўмовах пандэміі накіраваны ўрадам на разгляд у Адміністрацыю Прэзідэнта, а другі ўзровень мер разгледжаны на нядаўнім пасяджэнні Прэзідыума Саўміна. Разам з тым у выніку сустрэч з бізнесам Мінэканомікі бачыць неабходнасць у фарміраванні і трэцяга ўзроўню мер для стабілізацыі сітуацыі пасля пандэміі.
"Мы штотыдзень сустракаемся з бізнесам, адначасова праводзім маніторынг сітуацыі ў рэгіёнах і галінах. Гэтыя сустрэчы будуць прадаўжацца пастаянна, пакуль не закончацца праблемы, звязаныя з пандэміяй. Гэта пляцоўка - канал непасрэднай камунікацыі паміж бізнесам і ўрадам у свабодным фармаце", - адзначыў Аляксандр Чарвякоў.
Адна з тэм, якія хвалююць бізнес, - разлікі за электраэнергію. Намеснік міністра энергетыкі Сяргей Раянтовіч растлумачыў, што ДВА "Белэнерга" распрацуе лакальны прававы акт, які знізіць пені да 0,002 працэнта ад сумы нявыкананых спажыўцамі абавязацельстваў па ўнясенні перадаплаты за кожны каляндарны дзень пратэрміноўкі (па дагаворах была прадугледжана пеня ў памеры 1/365 стаўкі рэфінансавання, што складае 0,024 працэнта). Плануецца, што такая мера можа быць прыменена на тры месяцы (з 1 красавіка па 30 чэрвеня).
Па прапанове бізнес-асацыяцый наступная сустрэча запланавана з запрашэннем прадстаўнікоў Міністэрства фінансаў, Міністэрства па падатках і зборах і Нацыянальнага банка.-0-
