15 мая, Мінск /Кар. БЕЛТА/. У Беларусі доля рублёвага складніка ў сярэдняй шырокай грашовай масе ўзрасла да 51,8 працэнта ў красавіку 2023 года супраць 46,7 працэнта ў красавіку 2022 года. Аб гэтым сведчаць статыстычныя даныя Нацыянальнага банка, паведамляе БЕЛТА.
Гадавы прырост сярэдняй шырокай грашовай масы ў красавіку бягучага года склаў 17,4 працэнта супраць 8 працэнтаў месяцам раней. Паскарэнне тэмпаў прыросту абумоўлена "эфектам нізкай базы", а менавіта змяншэннем сярэдняй шырокай грашовай масы ў красавіку 2022 года ў адносінах да ўзроўню сакавіка 2022 года. Гадавы прырост сярэдняй рублёвай грашовай масы ў красавіку склаў 30,4 працэнта супраць 32,1 працэнта ў сакавіку 2023 года.
У красавіку ў адносінах да сакавіка 2023 года прырост сярэдняй шырокай грашовай масы склаў 2,7 працэнта сярэдняй рублёвай грашовай масы - 3 працэнты. Пры гэтым валютны складнік сярэдняй шырокай грашовай масы зменшыўся на 0,4 працэнта ў доларавым эквіваленце (у рублёвым эквіваленце вырас на 2,4 працэнта за кошт зніжэння курса беларускага рубля да долара ЗША). "Такім чынам, у Беларусі назіраецца паляпшэнне структуры шырокай грашовай масы, што адлюстроўвае працэс дэвалютызацыі эканомікі краіны", - адзначылі ў Нацбанку.
Адначасова прадаўжаецца пераарыентацыя ашчаднай актыўнасці насельніцтва на карысць банкаўскіх дэпазітаў у нацыянальнай валюце. У красавіку ў адносінах да сакавіка бягучага года прырост сярэдняга аб'ёму тэрміновых рублёвых дэпазітаў фізічных асоб склаў 1,6 працэнта, пры гэтым сярэдні аб'ём тэрміновых дэпазітаў насельніцтва ў замежнай валюце знізіўся на 1,3 працэнта.
У гадавым выражэнні прырост сярэдняга аб'ёму тэрміновых рублёвых дэпазітаў фізічных асоб у красавіку 2023 года склаў 26,2 працэнта пры змяншэнні сярэдняга аб'ёму тэрміновых валютных дэпазітаў насельніцтва на 5,9 працэнта.
Такім чынам, банкаўскія дэпазіты ў нацыянальнай валюце застаюцца для насельніцтва больш прывабным інструментам зберажэнняў у параўнанні з валютнымі.-0-
