8 лістапада, Мінск /Кар. БЕЛТА/. У Беларусі плануецца паэтапны пераход на ліцэнзаванне праз адзіны партал электронных паслуг, паведамілі БЕЛТА ў Міністэрстве па падатках і зборах.
"З 1 студзеня 2023 года ўступае ў сілу закон ад 14 кастрычніка 2022 года нумар 213-З "Аб ліцэнзаванні", які захоўвае асноўныя падыходы да ліцэнзавання, што дзейнічаюць цяпер, але разам з тым уносіць пэўныя карэктывы. Адным з новаўвядзенняў з'яўляецца паэтапны пераход на ліцэнзаванне праз адзіны партал электронных паслуг", - расказалі ў МПЗ.
Так, на працягу 2023 года дакументы па пытаннях ліцэнзавання могуць быць пададзены ў ліцэнзуючы орган асабіста ліцэнзіятам або накіраваны з дапамогай паштовай сувязі, а ў сферы ігральнага бізнесу - пададзены ў электроннай форме праз афіцыйны сайт МПЗ. З 1 студзеня 2024 года накіраванне ліцэнзіятамі заяў, паведамленняў, дакументаў (звестак), якія прыкладаюцца да іх, а таксама ліцэнзуючымі органамі паведамленняў аб прынятых рашэннях, прадпісанняў будзе ажыццяўляцца ў электроннай форме праз адзіны партал электронных паслуг. Пры гэтым да 1 студзеня 2025 года абмен дакументамі па пытаннях ліцэнзавання ў электроннай форме магчымы таксама з выкарыстаннем нацыянальнай паштовай электроннай сістэмы, электроннай пошты і іншых інфармацыйных сістэм (рэсурсаў), вызначаных Саветам Міністраў.
Прынятае ліцэнзуючым органам рашэнне аб прадастаўленні ліцэнзіі яе саіскальніку з 1 студзеня 2023 года будзе адлюстроўвацца ў адзіным рэестры ліцэнзій. Інфармацыя, у тым ліку персанальныя даныя, змешчаная ў гэтым рэестры, з'яўляецца агульнадаступнай (за выключэннем выпадкаў, устаноўленых заканадаўствам) і бясплатнай (доступ забяспечваецца кругласутачна праз інтэрнэт).
Такім чынам, з 1 студзеня 2023 года ліцэнзіі на дзейнасць у сферы ігральнага бізнесу больш не будуць выдавацца МПЗ у выглядзе папяровага дакумента. Разам з тым па заяве арганізатара азартных гульняў яму можа быць выдадзена пацвярджэнне прадастаўлення ліцэнзіі на папяровым носьбіце па форме і ў парадку, устаноўленым Саветам Міністраў.
Таксама прымяняльна да дзейнасці ў сферы ігральнага бізнесу законам "Аб ліцэнзаванні" ўнесены змяненні ў патрабаванні, якія прад'яўляюцца да саіскальніка ліцэнзіі. З 1 студзеня 2023 года ў іх ліку будзе адсутнасць нязнятай або непагашанай судзімасці за ўчыненне злачынстваў супраць парадку ажыццяўлення эканамічнай дзейнасці ў кіраўніка і намесніка кіраўніка юрыдычнай асобы, фізічнай асобы, якая з'яўляецца заснавальнікам (удзельнікам) саіскальніка ліцэнзіі. Таксама неабходна адсутнасць фактаў прыцягнення да адміністрацыйнай адказнасці за невыкананне мер па прадухіленні легалізацыі даходаў, атрыманых злачынным шляхам, фінансавання тэрарыстычнай дзейнасці і фінансавання распаўсюджвання зброі масавага паражэння, за ўчыненне фінансавай аперацыі, якая прывяла да легалізацыі даходаў, атрыманых злачынным шляхам, на працягу апошніх двух гадоў.
Цяпер такія патрабаванні прад'яўляюцца да саіскальнікаў ліцэнзіі на ажыццяўленне дзейнасці ў сферы ігральнага бізнесу па ўтрыманні віртуальнай ігральнай установы, а з 1 студзеня 2023 года яны будуць адносіцца да ўсіх саіскальнікаў ліцэнзіі і ліцэнзіятаў, якія звярнуліся ў МПЗ.-0-
