У Беларусі да 2040 года плануецца павялічыць да 40 працэнтаў уклад малога і сярэдняга бізнесу ў ВУП

14 кастрычніка, Мінск /Кар. БЕЛТА/. У Беларусі да 2040 года плануецца павялічыць да 40 працэнтаў уклад малога і сярэдняга бізнесу ў ВУП. Гэта прадугледжана праектам нацыянальнай стратэгіі ўстойлівага развіцця Беларусі на перыяд да 2040 года, паведамілі БЕЛТА ў прэс-службе Мінэканомікі.

Праект НСУР-2040 прадугледжвае захаванне курсу на стварэнне прывабных умоў для разняволення дзелавой ініцыятывы грамадзян, прыцягнення прадпрымальных людзей незалежна ад сацыяльнага статусу і ўзросту да адкрыцця ўласнай справы. Для дасягнення гэтай стратэгічнай мэты ў дакуменце прадугледжаны комплекс мер, які сфарміраваны па чатырох напрамках.

Першае - далейшае спрашчэнне і забеспячэнне стабільнасці прававога рэгулявання. Плануецца правядзенне абавязковай ацэнкі рэгуляторнага ўздзеяння, а максімальна магчымая колькасць адмінпрацэдур будзе пераведзена ў электронны фармат.

Другое - забеспячэнне даступнасці падтрымкі прадпрымальніцтва. Гэта прадугледжвае ўдасканаленне інстытуцыянальнай інфраструктуры для прадастаўлення дзелавых паслуг бізнесу, дыверсіфікацыю інструментаў дзяржаўнай фінансавай падтрымкі, развіццё новых інвестыцыйных прадуктаў на нацыянальным фінансавым рынку.

Трэцяе - маштабіраванне тэхналагічнага прадпрымальніцтва. Далейшае развіццё атрымаюць суб'екты навукова-інавацыйнай інфраструктуры ў рэгіёнах, каб стаць цэнтрамі прыцягнення эканамічных, кадравых і навуковых рэсурсаў. Чацвёртае - падрыхтоўка сучасных прафесійных кадраў.

"Рэалізацыя названых мер будзе садзейнічаць дынамічнаму развіццю канкурэнтаздольнасці малога і сярэдняга прадпрымальніцтва, паляпшэнню яго галіновай структуры, стварэнню новых высокапрадукцыйных рабочых месцаў. Прагназуецца да 2040 года павышэнне ўдзельнай вагі валавой дабаўленай вартасці, фарміруемай суб'ектамі малога і сярэдняга прадпрымальніцтва, у ВУП краіны да 40 працэнтаў", - расказалі ў міністэрстве.-0-