26 сакавіка, Мінск /Кар. БЕЛТА/. У камерцыйных банкаў будзе больш магчымасцей для крэдытавання з улікам прынятых Нацыянальным банкам мер. Такое меркаванне выказаў сёння журналістам старшыня савета Асацыяцыі беларускіх банкаў Мікалай Лузгін, каменціруючы прынятыя НББ контрцыклічныя меры для падтрымкі банкамі рэальнага сектара эканомікі, перадае карэспандэнт БЕЛТА.
"Банкі атрымаюць больш магчымасцей для дадатковага крэдытавання або пралангацыі раней выдадзеных крэдытаў. Неабходна адзначыць, што банкі і самі зацікаўлены ў забеспячэнні нармальнай жыццядзейнасці сваіх кліентаў - як юрыдычных, так і фізічных асоб. Нарматыўныя абмежаванні цяпер больш мяккія, таму ў банкаў больш свабоды ў частцы крэдытавання сваіх кліентаў", - лічыць Мікалай Лузгін.
Ён адзначыў, што Нацбанк даволі строга рэгулюе дзейнасць банкаў, у прыватнасці, па крэдытаванні рэальнага сектара эканомікі і насельніцтва. "Гэта робіцца ў першую чаргу для забеспячэння стабільнасці банкаўскай, фінансавай сістэмы. Але ў цяперашніх складаных эканамічных умовах Нацбанк пайшоў на некаторае аслабленне сваёй рэгулятарнай функцыі. Прынятыя меры накіраваны на аблягчэнне дзейнасці ў першую чаргу рэальнага сектара эканомікі ў цяперашніх складаных умовах", - звярнуў увагу Мікалай Лузгін.
Нацбанк змякчыў абмежаванні па крэдытаванні суб'ектаў гаспадарання, таксама зніжаны патрабаванні па дастатковасці валютнай выручкі для пагашэння валютных крэдытаў, зніжаны патрабаванні па стварэнні рэзерваў па крэдытах і г.д. Дадзены рэкамендацыі па магчымасці пралангацыі крэдытаў насельніцтву.
На думку Мікалая Лузгіна, на гэты час прынятыя рэгулятарам меры можна лічыць дастатковымі. "Але па меры развіцця сітуацыі, вядома, могуць быць прыняты і дадатковыя меры", - лічыць старшыня савета Асацыяцыі беларускіх банкаў.
Нацбанк 18 сакавіка прыняў шэраг контрцыклічных мер для павышэння магчымасцей банкаў па захаванні фінансавай падтрымкі рэальнага сектара эканомікі. Такое рашэнне прынята ва ўмовах павышанага ўплыву знешніх негатыўных фактараў. У прыватнасці, да 31 снежня 2020 года ўключна змяняюцца асобныя прудэнцыяльныя патрабаванні. Пры класіфікацыі актываў, што падпадаюць пад крэдытную рызыку, і фарміраванні спецыяльных рэзерваў банкам прадастаўляецца права не ўлічваць крытэрый дастатковасці паступленняў у замежнай валюце ў даўжнiка.
Наглядальным саветам банкаў накіраваны рэкамендацыі па прыярытэтным накіраванні ў 2020 годзе прыбытку за 2019 год і неразмеркаванага прыбытку мінулых гадоў у рэзервовы і статутны фонды. Рэгулятар рэкамендаваў у гэтым годзе не выплачваць дывідэнды акцыянерам.
26 сакавіка Нацбанк паведаміў аб дадатковых мерах, каб банкі маглі падтрымаць рэальны сектар. Да 31 снежня 2020 года банкам прадастаўляецца права прымяняць значэнне кансервацыйнага буфера капіталу ў памеры 2,25 працэнтнага пункта. Частка мер можа прымяняцца пры класіфікацыі актываў, што падпадаюць пад крэдытную рызыку, і фарміраванні спецыяльных рэзерваў.
НББ таксама рэкамендаваў камерцыйным банкам разгледзець магчымасць крэдытных канікул для насельніцтва - адтэрміноўкі вяртання (пагашэння) крэдыту і выплаты працэнтаў за карыстанне ім. Адначасова рэкамендавалася падоўжыць тэрмін вяртання крэдыту.-0-
