Фота mlyn.by
2 кастрычніка, Мінск /Кар. БЕЛТА/. Падрыхтоўку да XIII Форуму рэгіёнаў Беларусі і Расіі, які пройдзе ў 2026 годзе ў Мінскай вобласці, а таксама міжрэгіянальнае супрацоўніцтва, пытанні харчовай бяспекі разгледзелі ў Мінаблвыканкаме на пасяджэнні Міжпарламенцкай камісіі Рэспублікі Беларусь і Расійскай Федэрацыі, перадае карэспандэнт БЕЛТА.
Як расказаў намеснік старшыні Савета Рэспублікі Уладзіслаў Татарыновіч, мэта сустрэчы - далейшае развіццё міжпарламенцкага ўзаемадзеяння, умацаванне шматбаковых сувязей. Паміж урадам Рэспублікі Беларусь і суб'ектамі РФ заключана 88 пагадненняў. Яшчэ больш дамоўленасцей дасягнута на ўзроўні рэгіёнаў.
"Бакі нацэлены на ўстанаўленне прамых эканамічных сувязей. Наладжаны абмен візітамі. Толькі ў студзені - жніўні Беларусь наведалі 22 дэлегацыі пад кіраўніцтвам кіраўнікоў расійскіх рэгіёнаў, адбыўся 71 візіт беларускіх дэлегацый у расійскія рэгіёны. Усё гэта стварае ўмовы для росту ўзаемнага тавараабароту і аб'ёмаў гандлю паслугамі", - сказаў Уладзіслаў Татарыновіч.
Папярэдні Форум рэгіёнаў у Ніжнім Ноўгарадзе, які прайшоў летам бягучага года, аказаўся рэзультатыўным. Па яго выніках падпісана звыш 100 кантрактаў на больш як Br900 млн. Рэалізуюцца двухбаковыя праекты ў прамысловасці, будаўніцтве. Перспектыўнай сферай павінна стаць авіябудаванне.
"У Мінскай вобласці і Мінску папярэдне плануецца задзейнічаць пляцоўкі, якія ўжо добра зарэкамендавалі сябе. Гэта ў першую чаргу Мінскі міжнародны выставачны цэнтр, дзе зможам прадэманстраваць патэнцыял нашых рэгіёнаў у многіх галінах. Плануем правесці пленарныя пасяджэнні і з улікам нашай канструктыўнай дыскусіі будзем прапрацоўваць пытанне, каб XIII Форум рэгіёнаў прайшоў па эканамічным парадку дня. Эканамічнае ўзаемадзеянне - сур'ёзная аснова для далейшага развіцця Саюзнай дзяржавы. Мінскім аблвыканкамам сфарміраваны арганізацыйны камітэт. У нас таксама высокая ступень гатоўнасці. Высокую планку і ў далейшым будзем трымаць", - дадаў Уладзіслаў Татарыновіч.
Пачынаючы з 2026 года форумы рэгіёнаў плануецца праводзіць адзін раз за два гады. Гэта звязана са з'яўленнем яшчэ аднаго форуму - патрыятычнага, які будзе праходзіць напярэдадні 9 Мая. Аднак дэлегацыі Савета Рэспублікі і Савета Федэрацыі будуць сустракацца паміж форумамі па пэўных тэмах.
Намеснік старшыні Савета Федэрацыі Федэральнага сходу Расійскай Федэрацыі Юрый Вараб'ёў у сваю чаргу выказаў упэўненасць, што сумесная работа прадоўжыцца. Супрацоўніцтва пастаянна пашыраецца. "Нам важна, каб дамоўленасці, якія заключаюцца паміж рэгіёнамі, рэалізоўваліся з карысцю для нашых краін, народаў. Таму такі пастаянны кантроль з боку парламентаў ажыццяўляецца", - адзначыў ён.
Гаворачы пра харчовую бяспеку, Юрый Вараб'ёў звярнуў увагу на сумесныя падыходы да вырашэння актуальных пытанняў. "Размова ідзе і аб праблемах, звязаных з селекцыяй, аб абмене тэхналогіямі, падрыхтоўцы спецыялістаў у галіне сельскай гаспадаркі, больш дасканалым планаванні, кантролі за гэтым планаваннем, узаемасувязі нашых ведамстваў", - дадаў намеснік старшыні Савета Федэрацыі.
У пасяджэнні прынялі ўдзел старшыня Мінскага абласнога выканаўчага камітэта Аляксей Кушнарэнка, а таксама дэпутаты, прадстаўнікі Мінскай вобласці і расійскіх рэгіёнаў.-0-
Падпісвайцеся на нас у
