23 ліпеня, Мінск /Кар. БЕЛТА/. Сучасныя тэхналогіі дапамагаюць у час уборачнай кампаніі збіраць добры ўраджай нават пры складаных умовах надвор'я. Такое меркаванне выказаў журналістам старшыня Мінскага абласнога выканаўчага камітэта Аляксандр Турчын па выніках нарады ў кіраўніка дзяржавы па пытаннях арганізацыі ўборачнай кампаніі 2021 года, перадае карэспандэнт БЕЛТА.
Губернатар канстатаваў, што сучасная ўборачная кампанія - гэта тэхналагічны працэс. "У сельскую гаспадарку, у тэхніку, зернесушыльныя комплексы ўкладзена дастаткова сродкаў для таго, каб мы ўборачную кампанію праводзілі якасна і ў нарматыўныя тэрміны", - падкрэсліў ён.
Паводле яго слоў, у Мінскай вобласці ўсё падрыхтавана для своечасовай уборкі ўраджаю з палёў. "Плюс мы будуем 28 зернесушыльных комплексаў, закупім у гэтым годзе 40 сучасных камбайнаў Гомсельмаша", - адзначыў кіраўнік рэгіёна.
Што датычыцца прагнозаў на ўраджай, то Аляксандр Турчын лічыць магчымым, нягледзячы на складаныя ўмовы надвор'я, як мінімум захаваць паказчыкі мінулага года. "Калі працуеш тэхналагічна, любыя ўмовы надвор'я павінны аказваць мінімальны ўплыў на ўраджай, які атрымліваем. Спякота ўнесла свае карэктывы, але ў цэлым мы са стрыманым аптымізмам глядзім на вынікі, якія атрымае Мінская вобласць сёлета, - сказаў ён. - Прыблізна на ўзроўні мінулага года паказчыкі захаваем".-0-