31 кастрычніка, Мінск /Кар. БЕЛТА/. Дваццатае пасяджэнне Кансультацыйнага савета па валютнай палітыцы цэнтральных (нацыянальных) банкаў дзяржаў - членаў Дагавора аб Еўразійскім эканамічным саюзе прайшло сёння ў Мінску, паведамілі БЕЛТА ва ўпраўленні інфармацыі і грамадскіх сувязей Нацбанка Беларусі.
Удзельнікі пасяджэння абмеркавалі бягучую эканамічную сітуацыю і грашова-крэдытную палітыку ў дзяржавах - членах ЕАЭС, падыходы да рэалізацыі канцэпцыі фарміравання агульнага фінансавага рынку ЕАЭС, забеспячэнне інфармацыйнай бяспекі фінансавага рынку і процідзеянне камп'ютарным атакам у крэдытна-фінансавай сферы, каардынацыю развіцця нацыянальных плацежных сістэм, а таксама іншыя актуальныя тэмы інтэграцыйнага ўзаемадзеяння.
Акрамя таго, сёння адбылося 59-е пасяджэнне Савета Міждзяржаўнага банка. Разгледжаны вынікі дзейнасці гэтай фінансавай установы за першае паўгоддзе 2019 года, рэалізацыя стратэгіі банка на 2019-2023 гады, а таксама выкананне бюджэту ў бягучым годзе і праект бюджэту на 2020 год.
Кансультацыйны савет па валютнай палітыцы цэнтральных (нацыянальных) банкаў дзяржаў - членаў Дагавора аб ЕАЭС з'яўляецца кансультатыўна-дарадчым органам. Яго асноўная мэта - каардынацыя валютнай палітыкі, у тым ліку выпрацоўка адзіных падыходаў і напрамкаў курсавой палітыкі. Першае пасяджэнне савета адбылося ў красавіку 2012 года.
Міждзяржаўны банк - міжнародная разліковая і крэдытна-фінансавая ўстанова, якая ажыццяўляе дзейнасць у адпаведнасці з нормамі міжнароднага публічнага права. Банк заснаваны ў 1993 годзе. Яго заснавальнікамі з'яўляюцца дзяржавы ў асобе ўрадаў і цэнтральных (нацыянальных) банкаў краін СНД.-0-
