13 красавіка, Мінск /Кар. БЕЛТА/. Тульскі рэгіянальны фонд "Цэнтр падтрымкі прадпрымальніцтва" акрэдытаваўся ў якасці брокера Беларускай універсальнай таварнай біржы ў Расійскай Федэрацыі. Цырымонія ўручэння брокерскага сертыфіката адбылася ў Туле ў час семінара аб магчымасцях біржавога гандлю, арганізаванага БУТБ, паведамілі БЕЛТА ў прэс-службе біржы.
Чакаецца, што пры садзейнічанні новага брокера ўдасца не толькі прыцягнуць на пляцоўку БУТБ дадатковых удзельнікаў таргоў з сегмента малога і сярэдняга бізнесу, але і дыверсіфікаваць структуру біржавога тавараабароту Беларусі і Тульскай вобласці за кошт новых высокаліквідных таварных пазіцый.
"Супрацоўніцтва Беларусі і Тульскай вобласці ў сферы біржавога гандлю дэманструе ўстойлівую дадатную дынаміку. Па выніках мінулага года наш узаемны тавараабарот павялічыўся больш як у два разы. Падобныя тэмпы росту назіраліся і ў гэтым годзе. Лічу гэта лепшым доказам высокай зацікаўленасці тульскага бізнесу ў выкарыстанні біржавога механізма для работы на беларускім рынку", - адзначыла намеснік старшыні праўленя БУТБ Ірына Наркевіч, выступаючы з прэзентацыяй патэнцыялу біржавой гандлёвай платформы.
Тым не менш, на думку прадстаўніка біржы, у адсутнасць надзейнага партнёра, які мае разгалінаваную сетку дзелавых кантактаў у Тульскай вобласці, далейшае пашырэнне кола ўдзельнікаў таргоў з гэтага рэгіёна запатрабавала б значных затрат часу і рэсурсаў. Таму БУТБ вітае рашэнне Цэнтра падтрымкі прадпрымальніцтва атрымаць статус біржавога брокера. Паводле слоў Ірыны Наркевіч, гэта, безумоўна, акажа станоўчы ўплыў на паказчыкі ўзаемнага гандлю, паколькі ў выніку на біржу прыйдзе самая актыўная, гібкая і прагрэсіўная частка бізнес-супольнасці - невялікія прыватныя прадпрыемствы і індывідуальныя прадпрымальнікі.
"Трэба разумець, што брокер - гэта не проста прафесійны ўдзельнік рынку, а паўнацэнны прадстаўнік біржы, які адыгрывае важную ролю ў папулярызацыі біржавога гандлю. У сувязі з гэтым мы ўскладаем вялікія надзеі на нашага новага партнёра - Цэнтр падтрымкі прадпрымальніцтва Тульскай вобласці. Не сумняваюся, што з вашай дапамогай у нас атрымаецца зрабіць біржавыя таргі адным з асноўных механізмаў узаемадзеяння беларускіх і тульскіх прадпрыемстваў - як экспарцёраў, так і імпарцёраў", - падкрэсліла Ірына Наркевіч.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры. Па стане на 13 красавіка 2023 года на БУТБ акрэдытаваны амаль 3,2 тыс. суб'ектаў гаспадарання Расійскай Федэрацыі, 8 з якіх маюць статус біржавых брокераў.-0-
