16 лютага, Мінск /Кар. БЕЛТА/. Трэба паскараць зніжэнне адміністрацыйнай нагрузкі. Аб гэтым заявіў прэм'ер-міністр Беларусі Раман Галоўчанка ў час пасяджэння наглядальнага савета Банка развіцця, перадае карэспандэнт БЕЛТА.
"Мы разгледзім пытанні аб выніках работы нашага лічбавага офіса - Агенцтва сервісізацыі і рэінжынірынгу - за мінулы год. Напрамкі дзейнасці агенцтва істотна пашырыліся. На сёння гэта не толькі работа па аптымізацыі і лічбавізацыі адміністрацыйных працэдур, з чаго ўсё пачыналася, агенцтвам таксама вырашаюцца задачы па стварэнні лічбавых рэсурсаў у розных сферах дзейнасці", - сказаў Раман Галоўчанка.
Паводле яго слоў, у іх ліку - стварэнне рэестраў метаданых, электронных сэрвісаў, нарматыўна-даведачнай інфармацыі, укараненне сістэмы АІС "Справаздача". Прынята рашэнне ўрада аб аўтаматызацыі збору інфармацыі ў АПК і ў бюджэтнай сферы. Гэта павінна пазбавіць сельгасарганізацыі, бюджэтныя арганізацыі ад выканання шматлікіх запытаў аб прадастаўленні той ці іншай статыстычнай інфармацыі. Ідзе рэалізацыя пілотнага праекта ў Магілёўскай вобласці па лічбавізацыі і ўніфікацыі працэсаў кіравання праектамі і праграмамі, стварэнне лічбавай платформы для суб'ектаў малога і сярэдняга прадпрымальніцтва, а таксама транспартна-лагістычнай лічбавай платформы. Па кожным напрамку ўрадам вызначаны задачы і пастаўлены тэрміны іх выканання.
Прэм'ер-міністр падкрэсліў, што неабходна паскарацца. "Па-першае, бізнес усіх форм уласнасці і грамадзяне ўскладаюць на дзяржаву вялікія надзеі па больш хуткім скарачэнні адміністрацыйнай нагрузкі. Па-другое, цяпер як ніколі эфектыўнасць прыняцця кіраўніцкіх рашэнняў у многім залежыць ад аператыўнасці збору і якаснай аналітычнай апрацоўкі даных", - канстатаваў ён.
Раман Галоўчанка адзначыў, што галоўныя пытанні, на якія наглядальнаму савету сёння хочацца атрымаць адказы, наступныя. Як ідзе работа па выкананні пастаўленых перад агенцтвам задач? Ці вызначаны крыніцы фінансавання ў неабходных аб'ёмах? Што стрымлівае нарошчванне тэмпаў работ? Якія пытанні патрабуюць вырашэння на ўзроўні кіраўніка дзяржавы і ўрада.
Ён нагадаў, што ў жніўні мінулага года наглядальным саветам былі разгледжаны першыя вынікі работы агенцтва, былі ўдакладнены задачы на кароткую і сярэднетэрміновую перспектыву. Было даручана забяспечыць належны ўзровень узаемадзеяння і скаардынаванасці работы агенцтва і Міністэрства сувязі і інфарматызацыі. На нарадзе таксама разгледзяць, як гэта задача была выканана.-0-
