27 снежня, Масква /Эдуард Півавар - БЕЛТА/. Тэхнічны рэгламент Еўразійскага эканамічнага саюза "Аб бяспецы мяса птушкі і прадукцыі яго перапрацоўкі" ўступіць у сілу з 1 студзеня 2023 года, паведамілі БЕЛТА ў прэс-службе Еўразійскай эканамічнай камісіі.
"Тэхнічны рэгламент распаўсюджваецца на прадукты забою сельскагаспадарчай птушкі і прадукцыю з мяса птушкі і ўстанаўлівае да іх адзіныя тэрміналогію, правілы ідэнтыфікацыі, патрабаванні бяспекі, патрабаванні да працэсаў вытворчасці, захоўвання, перавозкі, рэалізацыі, утылізацыі і да маркіроўкі", - растлумачылі ў ЕЭК.
"Ацэнка адпаведнасці ўстаноўлена для прадуктаў забою птушкі ў форме ветэрынарна-санітарнай экспертызы, прадукцыі з мяса птушкі - дэкларавання адпаведнасці, прадукцыі з мяса птушкі для дзіцячага харчавання - дзяржаўнай рэгістрацыі", - удакладнілі ў прэс-службе.
Для ўстаранення ў ЕАЭС перашкод свабоднаму абарачэнню мяса птушкі і прадукцыі яго перапрацоўкі ў тэхнічным рэгламенце ўстаноўлены патрабаванні, у тым ліку максімальныя дапушчальныя ўзроўні астаткавай колькасці 50 ветэрынарных лекавых сродкаў у прадуктах забою птушкі; забарона на ўвядзенне ў неперапрацаваную прадукцыю з мяса птушкі вады і харчовых дабавак (уключаючы фасфаты); нарматыў масавай долі вільгаці, якая вылучылася пры размарожванні мяса птушкі (не больш за 4 працэнты).
У тэхрэгламент уключана таксама забарона на выкарыстанне пры вытворчасці прадукцыі з мяса птушкі для харчавання дзяцей шэрага харчовых дабавак (уключаючы кансерванты і ўзмацняльнікі смаку) і сыравіны з ГМА і пестыцыдамі. Устаноўлены дапушчальныя адхіленні паказчыкаў харчовай каштоўнасці (бялок, тлушч, вугляводы, каларыйнасць) ад пазначаных у маркіроўцы фактычных значэнняў. Акрамя таго, вытворца абавязаны адзначаць у маркіроўцы перапрацаванай прадукцыі (у выпадку выкарыстання) вады пры любым спосабе дабаўлення і мяса птушкі механічнай абвалкі.
"У рэгламенце ўстаноўлена адкладзеная норма па кантролі масавай долі вільгаці, якая вылучылася пры захоўванні ахалоджанага мяса птушкі, да распрацоўкі неабходнага стандарту і ўключэння яго ў пералікі стандартаў. Таксама прадугледжана распрацоўка змяненняў у тэхрэгламент, якія прадугледжваюць класіфікацыю ўсіх відаў прадукцыі з мяса птушкі на мясную і мясазмяшчальную групы", - дадалі ў ЕЭК.-0-