Тавараабарот $1 млрд, новыя праекты. Рагожнік расказаў аб супрацоўніцтве Беларусі і Татарстана

24 красавіка, Мінск /Кар. БЕЛТА/. Тавараабарот амаль $1 млрд, новыя планы і праекты - пасол Беларусі ў Расіі Аляксандр Рагожнік расказаў журналістам аб супрацоўніцтве Беларусі і Татарстана ў час рабочага візіту ў рэспубліку, перадае карэспандэнт БЕЛТА.

Паводле слоў Аляксандра Рагожніка, двухбаковае супрацоўніцтва паміж Беларуссю і Татарстанам развіваецца вельмі дынамічна. У аснове гэтай работы знаходзяцца добрыя адносіны паміж лідарамі. "Мы сёння наблізіліся ўжо ў тавараабароце да $1 млрд. З кіраўніком рэспублікі мы абмяркоўвалі праекты, якія б далі магчымасць пераадолець гэту планку, - адзначыў ён. - Мы гаварылі сёння аб вялікім праекце па рэнавацыі трамвайнай тэхнікі. Будзе распрацавана адпаведная праграма па яе абнаўленні. Размова вядзецца пакуль аб 100 трамваях, дзе адным з партнёраў будзе выступаць наш "Белкамунмаш". Гэта будуць сучасныя машыны. Рэнавацыя сёння дае магчымасць абнавіць гэты парк машын па кошце як мінімум у два разы танней за новую тэхніку".

Таксама абмяркоўваліся праекты ў нафтахімічным комплексе, сумесныя ініцыятывы ў прамысловай вытворчасці. "Прайшла сустрэча з генеральным дырэктарам ПАТ "КАМАЗ". Некалькі гадоў таму мы сфарміравалі цэлую праграму ўзаемадзеяння па тых вузлах, якія КАМАЗ імпартаваў з краін Еўрапейскага саюза, - расказаў ён. - Такая работа дае свой плён. Па пастаўках камплектуючых мы выйшлі ўжо на 7 млрд расійскіх рублёў па мінулым годзе. І мы будзем прадаўжаць дабаўляць, таму што многія кампаненты ў стадыі асваення".

У час рабочага візіту Аляксандр Рагожнік наведаў ТАА "Гандлёва-вытворчая кампанія МТЗ-Татарстан", дзе азнаёміўся з работай зборачнага цэха, сэрвіснага цэнтра грузавых аўтамабіляў, экспазіцыяй беларускай тэхнікі.