6 снежня, Мінск /Кар. БЕЛТА/. Аб экспарце беларускай сельскагаспадарчай прадукцыі ў праекце "У тэме" на YouTube-канале БЕЛТА расказала загадчыца кафедры менеджменту, тэхналогій бізнесу і ўстойлівага развіцця БДТУ Ірына Новікава.
"Многія беларускія прадпрыемствы, якія вырабляюць мясную прадукцыю, маюць халяльны сертыфікат і пастаўляюць яе, напрыклад, у Арабскія Эміраты. Там пачак смятаны аб'ёмам 200 г каштуе ад $5 да $10", - сказала Ірына Новікава.
Эксперт таксама расказала аб экспарце прадукцыі на рынкі Кітая і Японіі. "Мы высветлілі, што кітайцы не любяць пах цвёрдага сыру. Яны просяць, каб мы пастаўлялі сыр з водарам язміну, ружы. Гэта сведчыць аб тым, што рынкі трэба прапрацоўваць і для гэтага патрэбны спецыялісты", - адзначыла загадчык кафедры БДТУ.
Ірына Новікава дадала: "Мы першыя сталі рыхтаваць такіх спецыялістаў. Прадукцыя сельскай гаспадаркі ў нас адна з лепшых. З намі не можа параўнацца тое, што вырабляе Monsanto, напрыклад. Там практычна адна хімія. Таму трэба ганарыцца сваёй сельскай гаспадаркай".-0-
