28 верасня, Мінск /Кар. БЕЛТА/. Свярдлоўскі аблспажыўсаюз плануе стаць брокерам Беларускай універсальнай таварнай біржы ў Расіі. Аб гэтым заявіла старшыня праўлення саюза Алена Шаніна падчас наведвання цэнтральнага офіса БУТБ, паведамілі карэспандэнту БЕЛТА ў прэс-службе біржы.
У якасці брокера Свярдлоўскі аблспажыўсаюз плануе закупляць прадукцыю АПК, якая вырабляецца ў Беларусі, прадстаўляючы на таргах інтарэсы кааперацыйных арганізацый рэгіёна. "Мэта нашага візіту - забяспечыць арганізацыі спажывецкай кааперацыі саюза якаснай прадукцыяй сельскай гаспадаркі ў неабходных аб'ёмах. Акрэдытацыя ў якасці брокера бачыцца нам найбольш мэтазгодным варыянтам ўзаемадзеяння. Так мы зможам акумуляваць запатрабаванні нашых кампаній на беларускія тавары, а потым размяшчаць адпаведныя заяўкі ў біржавой гандлёвай сістэме. Гэта будзе своеасаблівая цэнтралізаваная закупка ад імя прадпрыемстваў спажыўкааперацыі Свярдлоўскай вобласці", - растлумачыла Алена Шаніна.
Першы намеснік старшыні праўлення БУТБ Эдуард Бельскі выказаў гатоўнасць біржы супрацоўнічаць са Свярдлоўскім аблспажыўсаюзам у любым фармаце, які задавольвае расійскі бок. "Мы адкрыты для супрацоўніцтва ў любым фармаце і па любых напрамках. Галоўнае, каб наша сумесная дзейнасць садзейнічала развіццю біржавога гандлю паміж Беларуссю і Свярдлоўскай вобласцю. Пакуль што з гэтага расійскага рэгіёна на біржавой пляцоўцы акрэдытаваны толькі 74 кампаніі. Як бачыце, у гэтым плане ёсць куды расці", - падкрэсліў Эдуард Бельскі.
Першы намеснік старшыні БУТБ таксама звярнуў увагу прадстаўнікоў Свярдлоўскага аблспажыўсаюза на тое, што акрамя ўстаранення залішніх пасрэдніцкіх звёнаў біржавы механізм дазваляе звесці да мінімуму большасць праблемных момантаў, з якімі сутыкаюцца кампаніі, што займаюцца трансгранічным гандлем. На думку Эдуарда Бельскага, гэта функцыя біржы можа быць запатрабавана ў Свярдлоўскай вобласці. "На біржы вы не сустрэнеце нядобрасумленных пастаўшчыкоў, таму што ўсе яны адсейваюцца яшчэ на этапе акрэдытацыі. Больш таго, мы ад пачатку і да канца суправаджаем кожную здзелку, таму нават калі ў працэсе выканання дагавора ўзнікаюць нейкія цяжкасці, удзельнік таргоў ніколі не застаецца з імі сам-насам, а можа разлічваць на максімальнае садзейнічанне біржы ў урэгуляванні пытання. Менавіта па гэтай прычыне многія замежныя кампаніі, у тым ліку з Расіі, аддаюць перавагу рабоце праз біржавую пляцоўку, тым самым пазбягаючы непатрэбных рызык", - падкрэсліў Эдуард Бельскі.-0-
