25 сакавіка, Мінск /Кар. БЕЛТА/. Сусветны банк прапрацоўвае выдзяленне Беларусі фінансавання для барацьбы з каранавірусам COVID-19, паведамілі БЕЛТА ў прадстаўніцтве СБ у Беларусі.
"Сусветны банк зробіць усё магчымае, каб дапамагчы Беларусі адрэагаваць на медыцынскія, сацыяльныя і эканамічныя праблемы, звязаныя з распаўсюджваннем COVID-19. Цяпер урад, ААН і Сусветны банк сумесна працуюць над планаваннем, фінансаваннем, а таксама над закупкай прадметаў медыцынскага прызначэння", - адзначылі ў прадстаўніцтве.
Пры гэтым магчымыя аб'ёмы і тэрміны фінансавання на гэты час яшчэ абмяркоўваюцца, удакладнілі ў СБ.
Раней паведамлялася, што з-за распаўсюджвання каранавіруса падтрымку кліентам у Беларусі акажа і Еўрапейскі банк рэканструкцыі і развіцця. "Улічваючы аб'ём праектаў у дзяржсектары, разгледзім і прапановы, звязаныя з імі", - тлумачылі ў ЕБРР.-0-
