Супрацоўніцтва ў сферы малога і сярэдняга бізнесу актывізуюць Беларусь і Турцыя

11 сакавіка, Мінск /Кар. БЕЛТА/. Дырэктар Дэпартамента па прадпрымальніцтве Міністэрства эканомікі Вольга Русіновіч правяла перагаворы з калегамі з Арганізацыі па развіцці і падтрымцы малога і сярэдняга прадпрымальніцтва Турцыі (КОСГЕБ), па выніках якіх бакі дамовіліся вывесці супрацоўніцтва ў сферы малога і сярэдняга бізнесу на новы ўзровень, паведамілі БЕЛТА ў прэс-службе Міністэрства эканомікі.

Мэтай зносін у анлайн-фармаце стала актывізацыя двухбаковага ўзаемадзеяння ў галіне развіцця прадпрымальніцтва, абмен практычным вопытам у стымуляванні і падтрымцы бізнесу, выпрацоўка новых прапаноў па пашырэнні партнёрскіх адносін паміж прадпрымальнікамі Беларусі і Турцыі.

Як удакладнілі ў прэс-службе Мінэканомікі, былі дасягнуты дамоўленасці аб аднаўленні экспертных кансультацый паміж спецыялістамі Дэпартамента па прадпрымальніцтве і КОСГЕБ па пытаннях удасканалення механізмаў фінансавай і нефінансавай падтрымкі суб'ектаў прадпрымальніцкай дзейнасці.

Акрамя таго, бакі пацвердзілі планы сумесна прыняць шэраг мер па паглыбленні беларуска-турэцкіх адносін. Для гэтага будзе распрацаваны план мерапрыемстваў па развіцці беларуска-турэцкага супрацоўніцтва ў сферы малога і сярэдняга прадпрымальніцтва. Дакумент плануецца адобрыць у час бліжэйшага візіту дэлегацыі турэцкіх дзелавых колаў у нашу краіну.-0-