Мікалай Снапкоў
27 студзеня, Мінск /Кар. БЕЛТА/. У інвестыцыйным супрацоўніцтве Беларусі і Кітая цяпер найбольш актуальная задача - пабудаваць бізнес, а не канкрэтнае прадпрыемства. Аб гэтым заявіў журналістам першы намеснік прэм'ер-міністра Мікалай Снапкоў па выніках нарады ў Прэзідэнта Беларусі Аляксандра Лукашэнкі па пытаннях развіцця супрацоўніцтва з Кітаем, перадае карэспандэнт БЕЛТА.
З пункту гледжання эканомікі для Беларусі вялікую каштоўнасць уяўляе інвестыцыйнае супрацоўніцтва з Кітаем. Стварэнне сумесных прадпрыемстваў і прыцягненне кітайскага капіталу ў краіну дае магчымасць атрымаць найбольшы эфект для фарміравання ВУП, падкрэсліў Мікалай Снапкоў.
"Нягледзячы на агульнасусветную сітуацыю, у нас зноў ёсць акно магчымасцей. Кітайскі рынак перанасычаны, канкурэнтны. Гэта датычыцца ўсяго - ад аўтамабілебудавання да грамадскага харчавання. Таму кітайскія партнёры, кітайскі бізнес шукае краіны для прымянення сваіх тэхналогій і вытворчасцей, - растлумачыў ён. - Яны зарабляюць больш на іншых рынках, чым у Кітаі. Наша галоўная задача - рэалізаваць пасыл, пра які гаварыў Прэзідэнт заўсёды: мы гатовы рэалізаваць самыя лепшыя ўмовы ў заходняй частцы еўразійскага кантынента для кітайскіх партнёраў. Што ўрад і будзе рабіць".
"Ключавое пытанне і выклік для нас - гэта інвестыцыі з Кітая, - падкрэсліў першы віцэ-прэм'ер. - Не задача пабудаваць прадпрыемства. Задача - пабудаваць бізнес".
Як паведамлялася БЕЛТА, прамыя кітайскія інвестыцыі ў Беларусі за 10 гадоў выраслі ў два разы. "Валавы аб'ём інвестыцый з Кітая ў Беларусь за 10 гадоў перасягнуў $2 млрд, з іх амаль палова - гэта прамыя замежныя інвестыцыі. За 9 месяцаў (2025 года. - Заўвага БЕЛТА) адносна мінулага года (да аналагічнага перыяду 2024-га. - Заўвага БЕЛТА) яны выраслі ў 2,6 раза і аб'ём валавых інвестыцый з Кітая склаў $443 млн. Калі ў 2015 годзе Кітай сярод донараў займаў пятае месца па валавых інвестыцыях, то па выніках 9 месяцаў - другое месца", - сказаў першы віцэ-прэм'ер на нарадзе ў кіраўніка дзяржавы 27 студзеня.
Паводле яго слоў, колькасць арганізацый з укладам у статутным фондзе з Кітая за 10 гадоў вырасла ў 3,4 раза: калі ў 2015 годзе было 67 такіх арганізацый, то ў 2025 годзе - 230. У 2025 годзе з прыцягненнем кітайскага капіталу і тэхналогій у Беларусі рэалізоўвалася больш за 60 інвестыцыйных праектаў з аб'ёмам заяўленых інвестыцый прыкладна $1,6 млрд. У асноўным ў індустрыяльным парку "Вялікі камень" - 52 інвестпраекты.
За кошт кітайскіх ільготных і камерцыйных крэдытаў за 20 гадоў было прафінансавана 28 буйных прамысловых праектаў на $5,5 млрд, у тым ліку ў сферах прамысловасці, энергетыкі, транспарту. "Праекты, рэалізаваныя з Кітаем, забяспечвалі каля дзясятай часткі прыросту беларускай эканомікі за дзесяцігоддзе", - падкрэсліў першы віцэ-прэм'ер.-0-
Падпісвайцеся на нас у
