19 верасня, Мінск /Кар. БЕЛТА/. Сяўба азімых збожжавых у Беларусі будзе завершана да 1 кастрычніка. Такое даручэнне аграрыям даў Прэзідэнт Беларусі Аляксандр Лукашэнка, паведаміў сёння журналістам намеснік прэм'ер-міністра Міхаіл Русы, перадае карэспандэнт БЕЛТА.
"Кіраўніком дзяржавы пастаўлена задача да 1 кастрычніка завяршыць сяўбу азімых збожжавых. Мы з вучонымі прааналізавалі паказчыкі пяці апошніх гадоў і ўстанавілі, што пасеянае ў больш познія тэрміны дае больш нізкі ўраджай. На сёння з планавых 1,3 млн га пасеяна 720 тыс. га азімых збожжавых, інакш кажучы, у прынцыпе мы ідзём у адпаведнасці з графікам", - сказаў Міхаіл Русы.
Уборку лёну плануецца завяршыць да 27 верасня. "У нас у гэтым годзе крыху цяжэйшая сітуацыя па Брэсцкай вобласці: там лён істотна падгарэў, а трэба забяспечыць заводы ў Ляхавічах і Пружанах. Мы прынялі рашэнне з Віцебскай вобласці перакінуць лён на гэтыя два заводы", - растлумачыў віцэ-прэм'ер.
Яшчэ адна задача, якая стаіць перад беларускімі аграрыямі, - уборка цукровых буракоў. "Уборка гэтай сельгаскультуры павінна быць завершана да 1 лістапада, кіраўнік дзяржавы паставіў такую задачу. Плануем сабраць 5 млн т цукровых буракоў. У бягучым годзе ў гэтай культуры нядрэнная ўраджайнасць і высокая цукрыстасць", - адзначыў Міхаіл Русы.
Акрамя таго, да 1 лістапада даручана ўбраць кукурузу на сілас і зялёны корм, а таксама на зерне. "Што датычыцца кукурузы на сілас, надвор'е ў гэтым годзе дало магчымасць нам пачаць работу раней, і прамаруджваць ні ў якім разе нельга. Цяпер таксама ідзе ўборка чацвёртага ўкосу траў. У цэлым чакаем, што атрымаем кармоў больш за мінулы год, - заявіў віцэ-прэм'ер. - Кукурузы на зерне ўжо ўбрана больш за 20 працэнтаў, намалочана больш за 300 тыс. т збожжа. Плануем атрымаць 1,3-1,4 млн т зерня кукурузы. Ураджайнасць вельмі добрая: 80 ц/га - у цэлым па краіне, а шэраг гаспадарак дае па 130-140 ц/га. Таму ёсць магчымасць кампенсаваць недабор зерня кукурузай, каб забяспечыць жывёлагадоўлю канцэнтраванымі кармамі. Што датычыцца дзяржзаказу, ён ужо амаль на 90 працэнтаў выкананы - 740 тыс. т харчовага збожжа ў засеках. Нам цалкам хопіць, каб забяспечыць сябе. Будзем забяспечаны і крупамі - нядрэнны ўраджай грэчкі, проса".
"Цяпер ідзе ўборка агародніны. Лічым, што пасля 1 лістапада на полі можа застацца толькі капуста позніх тэрмінаў паспявання, і тое да 7-га мы павінны завяршыць яе ўборку", - падкрэсліў Міхаіл Русы.
Для забеспячэння высокага ўраджаю ў наступным годзе таксама трэба правесці зяблевую апрацоўку глебы. Да 1 кастрычніка плануецца ўбраць усю салому, каб правесці зяблевае ўзворванне, і да 1 лістапада падняць амаль 2 млн га.
У гэтым годзе аграрыі атрымалі добры ўраджай бульбы і пладовых культур. "Пайшла ўжо закладка бульбы ў стабфонды, мяркуем, што 850 тыс. т пакладзём у нашы сховішчы. У нас небывалы ўраджай яблыкаў. Што датычыцца прамысловых садоў, мы звыш 100 тыс. т пакладзём у сховішчы і забяспечым сябе ў поўным аб'ёме, а таксама плануем значную колькасць паставіць на экспарт. Таксама закупляем яблыкі ў насельніцтва", - адзначыў віцэ-прэм'ер.-0-
