2 жніўня, Мінск /Аліна Грышкевіч - БЕЛТА/. Надзвычайны і Паўнамоцны Пасол Рэспублікі Беларусь у Кітайскай Народнай Рэспубліцы Юрый Сянько ў эфіры праграмы "Размова ў Прэзідэнта" на тэлеканале "Беларусь 1" расказаў пра важнасць удзелу Беларусі ў дзейнасці ШАС, паведамляе БЕЛТА.
"Шанхайская арганізацыя супрацоўніцтва (а мы ўжо ў вельмі высокай ступені гатоўнасці ўсіх рашэнняў па ўваходжанні туды Беларусі як паўнапраўнага члена і ўдзельніка) - гэта, вядома ж, вялізны рынак і далучэнне да ўсіх праектаў супрацоўніцтва. У тым ліку Кітай прапануе для членаў ШАС свае магчымасці, свае рынкі, сваю інжынерную думку", - адзначыў дыпламат.
Пасол растлумачыў, што з далучэннем да такой магутнай структуры, як Шанхайская арганізацыя супрацоўніцтва, з'яўляецца магчымасць удзельнічаць ва ўсіх праектах і будучых ініцыятывах, яны вельмі цікавыя для Беларусі.
"ШАС, у тым ліку з удзелам Кітая, - гэта магутнае аб'яднанне, у першую чаргу эканамічнае, у якім хочуць бачыць і Рэспубліку Беларусь. Гэта цікава, важна і сучасна", - рэзюмаваў кіраўнік беларускай дыпламатычнай місіі.-0-