14 чэрвеня, Мінск /Кар. БЕЛТА/. Шырокая грашовая маса ў Беларусі, якая ўключае наяўныя грошы ў абарачэнні, сродкі насельніцтва і прадпрыемстваў на рахунках у банках, на 1 чэрвеня склала Br43,388 млрд, павялічыўшыся ў параўнанні з паказчыкам на 1 мая на 2,2 працэнта. Такія даныя размешчаны на сайце Нацыянальнага банка Беларусі, паведамляе БЕЛТА.
Аб'ём наяўных грошай у абароце (грашовы агрэгат M0) за май вырас да Br3,101 млрд, або на 2,8 працэнта.
Актыўная рублёвая грашовая маса - грашовы агрэгат M1, які ўключае наяўныя грошы ў абароце і пераводныя дэпазіты ў нацыянальнай валюце (сродкі на бягучых рублёвых рахунках, уклады да запатрабавання ў рублях, іншыя рахункі ў рублях), - у маі вырасла на 3,6 працэнта і склала Br8,115 млрд.
Грашовы агрэгат М2 (грашовая маса ў нацыянальным вызначэнні), які ўключае агрэгат М1 і іншыя (тэрміновыя, умоўныя) дэпазіты ў нацыянальнай валюце, на 1 чэрвеня склаўся на ўзроўні Br15,83 млрд, павялічыўшыся за май на 3 працэнты.
Аб'ём каштоўных папер, выпушчаных банкамі (па-за банкаўскім абаротам) у нацыянальнай валюце, за май вырас да Br1,242 млрд, або на 7,5 працэнта.
Рублёвая грашовая маса (грашовы агрэгат М2*), якая, акрамя агрэгата М1, уключае іншыя (тэрміновыя, умоўныя) рублёвыя дэпазіты, сродкі насельніцтва і юрыдычных асоб у рублёвых каштоўных паперах, на 1 чэрвеня склала Br17,072 млрд і вырасла за мінулы месяц на 3,3 працэнта.
Аб'ём каштоўных папер, выпушчаных банкамі (па-за банкаўскім абаротам) у замежнай валюце, за май знізіўся да Br2,018 млрд, або на 1,9 працэнта.-0-
