Шпілеўская: у Беларусі кожны трэці прадпрымальнік - жанчына

29 мая, Мінск /Кар. БЕЛТА/. У Беларусі кожны трэці прадпрымальнік - жанчына. Аб гэтым заявіла журналістам старшыня грамадскага аб'яднання "Беларускі саюз жанчын" Вольга Шпілеўская ў час другога рэспубліканскага форуму жанчын-прадпрымальніц "Энергія і стварэнне", перадае карэспандэнт БЕЛТА.

"Сёння праходзіць другі форум. Чаму мы вырашылі яго правесці? Таму што першы форум прайшоў паспяхова. Другі форум падвядзе вынікі таго, што прайшло за гэты перыяд, і намеціць перспектывы на будучыню, - адзначыла Вольга Шпілеўская. - Вельмі рада, што ў нас удзельнічаюць не толькі жанчыны-прадпрымальніцы з усіх рэгіёнаў (цікавасць была вялізная і яны вельмі чакалі гэтай сустрэчы), але і дзяржорганы, гэта значыць у нас атрымліваецца прамы кантакт, жывы дыялог, калі можна адкрыта задаць пытанні і атрымаць на іх адказы. Гэта, напэўна, самае каштоўнае".

Паводле яе слоў, у Беларусі бізнес і ўлада не існуюць паасобку. "Усе пытанні мы вырашаем разам. Жанчын-прадпрымальніц чуюць і ўлічваюць іх пажаданні пры прыняцці тых ці іншых заканадаўчых актаў", - расказала старшыня БСЖ.

"Настрой ва ўсіх жанчын пазітыўны, добры. Кожная падзеліцца сваімі поспехамі ў вядзенні бізнесу, - падкрэсліла Вольга Шпілеўская. - Сёння будуць закрануты розныя тэмы, якія датычацца ў тым ліку дзяржаўнай палітыкі. Падвядзём вынікі нашага ўдзелу ў беларуска-ўзбекскіх жаночых бізнес-форумах. Сярод выступоўцаў будуць тыя, хто прывядзе канкрэтныя прыклады эканамічнага супрацоўніцтва, якія склаліся пасля гэтых форумаў, калі мы перайшлі да заключэння кантрактаў. Разгледзім развіццё гістарычнага турызму. Гэта значыць вельмі шмат напрамкаў. Сёння кожны трэці прадпрымальнік у нашай краіне - гэта жанчына".

На працягу двух дзён, 29 і 30 мая, жанчыны-прадпрымальніцы з усёй Беларусі будуць абмяркоўваць надзённыя пытанні, дзяліцца вопытам. Стартаваў форум з пленарнага пасяджэння ў Нацыянальнай бібліятэцы Беларусі.  
 
"Жанчыны-прадпрымальніцы - гэта не пра грошы, а пра сацыяльную адказнасць, інклюзію, дапамогу ў цяжкіх сітуацыях. Таму мы і хочам паказаць жаночае аблічча нашага бізнесу і даказаць, напэўна, яшчэ раз усім і самім сабе, што гэта важны складнік развіцця эканомікі краіны, - падкрэсліла Вольга Шпілеўская. - Калі раней мы гаварылі, што жанчынам уласціва больш сацыяльная сфера - адукацыя, гандаль, паслугі, то сёння ў нас жанчыны ўжо і ў горназдабыўной прамысловасці, і ў цяжкай прамысловасці, і ў дрэваапрацоўцы. Мне здаецца, жанчынам даступна абсалютна ўсё. Галоўнае - жаданне жанчын, а з боку дзяржавы ёсць магчымасць развіцця жаночага бізнесу. І мы не можам падвесці сваю краіну ні ў адным напрамку, за які бяромся".

Прывітальны адрас удзельнікам форуму накіравала і старшыня Савета Рэспублікі Наталля Качанава. Яго зачытаў старшыня Пастаяннай камісіі па эканоміцы, бюджэце і фінансах Савета Рэспублікі Уладзіслаў Татарыновіч.

"Беларусь багатая яркімі прыкладамі жаночага лідарства. Сёння больш за 40 працэнтаў беларускіх прадпрымальнікаў - гэта менавіта жанчыны. Нашы суайчынніцы, якія ўвасабляюць унутраную сілу, мудрасць і высокую адказнасць, не проста пацвярджаюць магчымасць эфектыўнага спалучэння бізнесу і творчасці, але і на працягу ўсяго свайго жыцця даказваюць, што гармонія паміж сямейным жыццём і кар'ерай - гэта не мара, гэта рэальнасць, - гаворыцца ў прывітанні. - У сучасных умовах, калі свет змяняецца з небывалай хуткасцю, ваша энергія, крэатыўнасць, ініцыятыўнасць становяцца краевугольнымі камянямі ўстойлівага развіцця нашай дзяржавы. Вы па-майстэрску рэалізуеце ўласныя бізнес-праекты, фарміруеце пазітыўны імідж беларускага жаночага прадпрымальніцтва, прыярытэты якога - паляпшэнне якасці жыцця, сацыяльныя, экалагічныя аспекты, стымуляванне навацый".