4 верасня, Масква /Эдуард Півавар - БЕЛТА/. Усе сертыфікаты, што выдаюцца на лякарствы ў адной краіне Еўразійскага эканамічнага саюза, з 2021 года будуць узаемна прызнавацца астатнімі дзяржавамі ЕАЭС. Гэта прадугледжана прынятым сёння рашэннем Савета Еўразійскай эканамічнай камісіі, паведамілі БЕЛТА ў прэс-службе ЕЭК.
"Савет ЕЭК 4 верасня расшырыў палажэнні рашэння Савета камісіі ад 3 лістапада 2016 года нумар 93 "Аб прызнанні вынікаў інспектавання вытворчасці лекавых сродкаў" у частцы ўзаемнага прызнання пры нацыянальнай рэгістрацыі сертыфікатаў GMP саюза і іх прымянення для лекавых прэпаратаў, вырабленых за межамі Еўразійскага эканамічнага саюза", - праінфармавалі ў ЕЭК.
"На перыяд з 2021 па 2025 год устаноўлена ўзаемнае прызнанне, па-першае, нацыянальных сертыфікатаў GMP дзяржаў ЕАЭС, па-другое, сертыфікатаў GMP саюза пры ўнясенні змяненняў у рэгістрацыйнае дасье і прадаўжэнні нацыянальных рэгістрацыйных пасведчанняў для лякарстваў, вырабленых у ЕАЭС, па-трэцяе, пры нацыянальнай рэгістрацыі сертыфікатаў GMP саюза для лекавых сродкаў, вырабленых у трэціх краінах", - растлумачылі ў ЕЭК.
Гэтыя змяненні дадуць магчымасць выключыць паўторныя інспекцыі вытворцаў лекавых сродкаў з боку ўпаўнаважаных органаў дзяржаў ЕАЭС з 1 студзеня 2021 года. Гэта, у сваю чаргу, павялічыць даступнасць лякарстваў, а таксама зменшыць выдаткі рэгулятарных органаў і вытворцаў.-0-