23 чэрвеня, Мінск /Кар. БЕЛТА/. Перагаворныя працэсы па ўступленні Беларусі ў Сусветную гандлёвую арганізацыю засталося завяршыць з ЕС, ЗША, Канадай, Украінай і Новай Зеландыяй. Аб гэтым карэспандэнту БЕЛТА расказаў пасол па асобых даручэннях Міністэрства замежных спраў Беларусі і кіраўнік перагаворнай дэлегацыі па далучэнні краіны да Сусветнай гандлёвай арганізацыі Уладзімір Серпікаў у час рэгіянальнага круглага стала з бізнес-супольнасцю, які праходзіць сёння ў Мінаблвыканкаме.
"Уступленне ў Сусветную гандлёвую арганізацыю з'яўляецца адной з прыярытэтных задач знешнегандлёвай палітыкі Беларусі. Працэс далучэння працяглы, краіна вядзе перагаворы па гэтым пытанні з 1993 года. На працягу гэтага часу ў вырашэнні пытання існавалі некаторыя паўзы, але гэта было абумоўлена знешнепалітычнай кан'юнктурай. Важна мець роўныя адносіны з ключавымі партнёрамі па СГА, якія мы планамерна стараемся выбудоўваць. Сёння можна сказаць, што мы знаходзімся на завяршальнай стадыі перагаворнага працэсу. Завяршылі іх з Кітайскай Народнай Рэспублікай, Рэспублікай Карэя, Японіяй, Нарвегіяй, Эквадорам, Гватэмалай, Сальвадорам, Ісландыяй, Аргенцінай, Швейцарыяй, Аўстраліяй, Індыяй, Турцыяй, хутка падпішам пратакол з Бразіліяй. Засталося дамовіцца з ЕС, ЗША, Канадай, Украінай і Новай Зеландыяй. З некаторымі з іх перагаворы ўжо блізкія да завяршэння, фактычна засталося вырашыць па адным пытанні. З Украінай і ЗША давядзецца папрацаваць, каб вывесці працэс на заключную стадыю, але, спадзяюся, большая частка шляху ўжо пройдзена", - расказаў Уладзімір Серпікаў.
Ён таксама адзначыў, што ўступленне ў СГА - гэта не толькі перавагі для краіны, але і абавязацельствы. Аднак станоўчых бакоў намнога больш, чым адмоўных. "За апошні год перагаворны працэс запаволіўся ў сувязі з пандэміяй каранавіруснай інфекцыі. Тым не менш работа праводзіцца пастаянна. Паслядоўна і цярпліва вядзём перагаворы, каб прывесці працэс уступлення ў арганізацыю да лагічнага завяршэння, паколькі членства ў ёй дазволіць краіне выйсці на новы ўзровень. Для міжнароднай бізнес-супольнасці, буйных міжнародных карпарацый гэта стане знакам, што мы прытрымліваемся агульнапрынятых правіл знешнеэканамічнай дзейнасці, забяспечваем належную абарону замежных інвестараў. Гэта дасць ім упэўненасць, а нам дазволіць яшчэ больш адкрыць краіну для прыцягнення інвестыцый. Дзякуючы ім у дзяржаве будуць стварацца новыя працоўныя месцы, узрасце канкурэнцыя на рынку працы, што прывядзе да павышэння заработнай платы і ў цэлым дабрабыту людзей", - падкрэсліў пасол па асобых даручэннях.
Рэгіянальныя круглыя сталы з бізнес-супольнасцю па пытаннях уступлення Беларусі ў СГА арганізуюцца Праграмай развіцця Арганізацыі Аб'яднаных Нацый у партнёрстве з МЗС Беларусі. Мерапрыемствы праходзяць па ўсёй краіне. У час круглых сталоў прадстаўнікі мясцовага бізнесу знаёмяцца з дынамікай уступлення рэспублікі ў СГА і асноўнымі перавагамі для бізнесу ад членства краіны ў гэтай глабальнай арганізацыі. Удзельнікі абмяркоўваюць практычныя пытанні, звязаныя з прасоўваннем беларускіх тавараў і паслуг на знешнія рынкі ва ўмовах уступлення краіны ў СГА, праводзяць рабочыя кансультацыі з экспертамі ў галіне міжнароднай гандлёвай палітыкі.-0-
