11 кастрычніка, Мінск /Кар. БЕЛТА/. Нягледзячы на эканомныя ўмовы фарміравання рэспубліканскага бюджэту на 2022 год, бюджэтнікі, пенсіянеры не адчуюць ніякай дадатковай нагрузкі. Аб гэтым у эфіры тэлеканала АНТ заявіў міністр фінансаў Юрый Селіверстаў, паведамляе БЕЛТА.
Па выніках гэтага года бюджэтныя чаканні сціплыя, але пазітыўныя. "Першапачаткова, калі мы фарміравалі яго на бягучы год, зыходзілі з кансерватыўных ацэнак", - сказаў Юрый Селіверстаў. Тады было незразумела, як краіна будзе выходзіць з пандэміі, колькі ўдасца зарабіць эканоміцы. "У нас быў даволі важкі дэфіцыт, на ўзроўні Br4 млрд, які з улікам удакладненняў у пачатку года ўзрос да Br6 млрд, гэта значыць больш за 3 працэнты ВУП. Яго планавалася пакрыць за кошт астаткаў бюджэту, "падушкі", якую мы скапілі ў папярэднія гады. Але па выніках 9 месяцаў наш дэфіцыт складае крыху больш за Br1 млрд, менш за 1 працэнт ВУП. Чаканні па гэтым годзе: напэўна, мы не зможам поўнасцю выйсці з дэфіцыту, аднавіцца так, як мы працавалі да таго. Плюс пэўныя галіны зведваюць санкцыйны націск. Але нейкіх збояў, неплацяжоў, невыканання дзяржавай сваіх абавязацельстваў або нейкіх дадатковых мер, якія спатрэбіцца прыняць і яны паўплываюць на дабрабыт грамадзян, - такога не будзе", - запэўніў міністр.
Бюджэт на будучы год плануецца таксама ў эканомных умовах і з улікам кансерватыўных сцэнарыяў. Групуюцца ўсе даходы, выключаюцца расходы, якія могуць пачакаць, каб максімальна быць у балансе і мець рэзервы.
Пры гэтым на бюджэтнікаў не будзе дадатковай нагрузкі. "Рост заработнай платы ў любым выпадку будзе. Ён будзе мець рэальнае значэнне, гэта значыць будзе вышэйшы, чым інфляцыя", - падкрэсліў міністр.-0-
