У гэтыя дні на базе выставачнага цэнтра Кітайска-беларускага індустрыяльнага парка "Вялікі камень" праходзіць Міжнародная спецыялізаваная выстаўка "Белагра-2023". Тут свае экспазіцыйныя блокі дэманструюць буйнейшыя вытворцы сельскагаспадарчай тэхнікі. Сярод гігантаў АПК прадстаўлена і ААТ "Гомсельмаш". Аб навінках вытворчасці, мадэрнізацыі папулярных мадэлей камбайнаў і планах па экспарце расказаў карэспандэнту БЕЛТА намеснік дырэктара па рэалізацыі і развіцці - дырэктар цэнтра маркетынгу і рэкламы ААТ "Гомсельмаш" Дзмітрый Муляр.
Мадэрнізаваныя камбайны і новыя складнікі
Паводле слоў Дзмітрыя Муляра на выстаўцы "Белагра" "Гомсельмаш" прадставіў тры мадэлі збожжаўборачных машын. Сярод іх і флагман вытворчасці - камбайн GS2124.
"У гэтым годзе мы прадстаўляем гэты камбайн разам з сістэмай дакладнага земляробства, якая была распрацавана сумесна з расійскай кампаніяй Cognitive Agro Pilot. Плануецца, што камбайн паедзе ў гаспадарку "Крутагор'е-Петкавічы", дзе працуе ўжо такая машына, але без гэтай сістэмы. Там мы плануем правесці параўнальныя выпрабаванні і паглядзець, як камбайн сябе паводзіць з сістэмай дакладнага земляробства і без яе. Дарэчы, у мінулым годзе на гэтым камбайне мы ўстанавілі рэкорд у Беларусі і намалацілі больш за 6 тыс. т збожжа", - адзначыў намеснік дырэктара.
Таксама ён дадаў, што на выстаўцы экспануецца самая масавая машына ў СНД - камбайн GS12A1 PRO.
"Гэта мадэль хоць і выходзіць з 2006 года, але пастаянна мадэрнізуецца. На гэты момант ужо больш за 22 тыс. такіх камбайнаў працуе ў СНД і Еўропе. Адзначу, што і парк сельгастэхнікі Беларусі на 80 працэнтаў сфарміраваны з машын гэтай мадэлі", - заявіў спецыяліст.
Акрамя таго, Дзмітрый Муляр расказаў пра камбайн GS5 і дадаў, што гэта машына больш за ўсё падыходзіць для фермерскіх гаспадарак.
"Гэты камбайн арыентаваны на краіны з драбнаконтурнымі палямі. Напрыклад, такія як Таджыкістан і Грузія. Немалаважна, што з дапамогай менавіта гэтага камбайна мы праводзім наша шоу на "Белагра", у час якога выгружаем для ўсіх наведвальнікаў цукеркі", - падкрэсліў прадстаўнік "Гомсельмаша".
Акрамя іншага, на выстаўцы дэманструецца абноўлены кормаўборачны камбайн FS80 PRO з пэўнымі дапаўненнямі. Сярод новаўвядзенняў спецыяліст вылучыў кабіну, люстэркі, крэслы на пнеўмападвесцы, а таксама аўтаматычнае завострыванне нажоў з кабіны.
"Гэты камбайн таксама даволі масавы і вырабляецца ўжо амаль 20 гадоў. У гэтым годзе на камбайне ўстаноўлена новая складная жняярка ЖКС-4,5, якую не трэба адчэпліваць перад тым, як выязджаць на дарогі агульнага карыстання. Акрамя таго, з гэтай машынай прадстаўляем бездарожны падборшчык для траў", - канстатаваў намеснік дырэктара па рэалізацыі і развіцці.
Ён расказаў і аб новай машыне УЭС-2-280А, якая працуе з мульчыруючай фрэзай і прызначана для падрыхтоўкі палёў. Таксама даччынае прадпрыемства "Гомсельмаша" "Брансксельмаш" прадставіла на экспазіцыі сеялку СПС-6500.
Планы па вытворчасці і экспарце
Як заявіў Дзмітрый Муляр, за першыя чатыры месяцы 2023 года тэмп росту аб'ёмаў вытворчасці "Гомсельмаша" склаў 178 працэнтаў, а тэмп росту экспарту - 168 працэнтаў.
"Наша прадпрыемства павінна забяспечыць тэмп росту экспарту па годзе на ўзроўні каля 109-110 працэнтаў, але мы разлічваем перавыканаць гэтыя паказчыкі. Асабліва з улікам ужо існуючых вынікаў", - падзяліўся планамі спецыяліст.
Паводле яго слоў, у мінулым годзе "Гомсельмаш" выпусціў 2,5 тыс. самаходных машын. "На гэты год у нас стаяць даволі амбіцыйныя планы - хочам нарасціць выпуск не менш як на 500 экзэмпляраў і вырабіць 3 тыс. машын. Да ўборачнага сезона - да 10 жніўня - мы павінны паставіць у сельгасарганізацыі Беларусі не менш як 600 камбайнаў", - звярнуў увагу намеснік дырэктара.
Гаворачы аб геаграфіі экспарту, ён адзначыў, што асноўная колькасць тэхнікі ідзе ў Расію.
"Рынак Расійскай Федэрацыі займае ў агульным аб'ёме паставак "Гомсельмаша" каля 65 працэнтаў, а ў агульным аб'ёме экспарту - каля 75 працэнтаў. Акрамя таго, у гэтым годзе мы ўжо адгружалі камбайны ў Зімбабвэ, Грузію і Тога. Таксама ў нас ёсць праекты з іншымі краінамі Афрыкі, а таксама Бразіліяй. Прадаўжае работу наш філіял у Аргенціне, а таксама адгружаем камбайны ў Перу. У дадатак да ўсяго ў гэтым годзе плануем паставіць 450-500 машын у Казахстан", - рэзюмаваў Дзмітрый Муляр.
БЕЛТА, фота Таццяны Матусевіч, Віталя Піваварчыка.-0-
