23 чэрвеня, Масква /Эдуард Півавар - БЕЛТА/. Пасяджэнне Савета Еўразійскай эканамічнай камісіі адбудзецца ў бліжэйшы час, у яго парадак дня ўключаны 25 пытанняў. Аб гэтым напісала на сваёй старонцы ў Facebook памочнік старшыні Калегіі ЕЭК Ія Малкіна, паведамляе БЕЛТА.
"Парадак дня насычаны, 25 пытанняў. Віцэ-прэм'еры разгледзяць ход работы над праектам пагаднення аб прымяненні ў ЕАЭС навігацыйных пломб для адсочвання перавозак тавараў, а таксама па ўстараненні бар'ераў на ўнутраным рынку; пытанне актывізацыі супрацоўніцтва ў авіябудаванні. Чакаецца, што савет прыме рашэнне аб пачатку рэалізацыі праекта "Лічбавае тэхнічнае рэгуляванне ў рамках ЕАЭС", - адзначыла Ія Малкіна.
Таксама ў парадку дня - пытанне прымянення лічбавых тэхналогій для забеспячэння свабоды перамяшчэння грамадзян краін ЕАЭС з мэтай прадухілення распаўсюджвання COVID-19, тэма ўдасканалення парадку ацэнкі лічбавых рынкаў, якія функцыянуюць на тэрыторыі дзяржаў ЕАЭС, і размежавання паўнамоцтваў паміж антыманапольнымі органамі краін саюза і ЕЭК.
"Мяркуецца, што Савет ЕЭК унясе змяненні ў правілы належнай вытворчай практыкі ЕАЭС, у тэхнічны рэгламент "Аб бяспецы харчовай прадукцыі", у методыку разліку і парадак накладання штрафаў за парушэнне агульных правіл канкурэнцыі на трансгранічных рынках, у правілы вызначэння краіны паходжання асобных відаў тавараў для мэт дзяржзакупак", - дадала Ія Малкіна.-0-
