14 верасня, Масква /Эдуард Півавар - БЕЛТА/. Савет Еўразійскай эканамічнай камісіі дасягнуў прынцыповых дамоўленасцей аб увядзенні маркіроўкі асобных відаў малочнай прадукцыі па меры гатоўнасці дзяржаў - членаў Еўразійскага эканамічнага саюза, паведаміў БЕЛТА прадстаўнік гандлёвага блока ЕЭК Аляксей Ашыхмін.
"Абмеркаванне канкрэтных тэрмінаў, не раней за якія можа быць уведзена забарона на абарот немаркіраваных тавараў, у гэты момант завяршаецца", - праінфармаваў прадстаўнік гандлёвага блока.
Паводле даных Аляксея Ашыхміна, Расія ўжо заявіла пра гатоўнасць увядзення маркіроўкі на асобныя віды малочнай прадукцыі, запланаваныя даты ўкаранення замацаваны ў праекце пастановы ўрада РФ. Так, згодна з праектам, які праходзіць этап грамадскага абмеркавання, абавязковую маркіроўку малака, вяршкоў і марожанага з тэрмінам захоўвання больш за 28 сутак мяркуецца ўвесці ў Расіі з 20 студзеня 2021 года. У адносінах да прадукцыі меншага тэрміну прыдатнасці, а таксама згушчонкі, масла, сыру і тварагу маркіроўка можа быць уведзена з 1 ліпеня 2021 года. Што датычыцца маслёнкі, ёгурту і кефіру, то гэта прадукцыя можа пачаць маркіравацца ў абавязковым парадку з 1 кастрычніка 2021 года. Як чакаецца, канчатковае рашэнне па этапах укаранення маркіроўкі будзе прынята Расіяй у лістападзе.
"Расшырэнне лінейкі маркіруемых тавараў вядзе да далейшага скарачэння шэрай прадукцыі і фальсіфікату на рынку саюза. А гэта, з улікам сацыяльнай значнасці малочнай прадукцыі, дасць магчымасць лепш забяспечваць бяспеку і ахову правоў найбольш неабароненых катэгорый грамадзян", - заявіў член Калегіі (міністр) па гандлі ЕЭК Андрэй Сляпнёў.
Пагадненне аб маркіроўцы тавараў сродкамі ідэнтыфікацыі ў ЕАЭС уступіла ў сілу 29 сакавіка 2019 года. Яно з'яўляецца рамачным дакументам, які вызначае асноўныя правілы ўвядзення адзінай маркіроўкі адносна ўзгодненай групы тавараў на тэрыторыі саюза. Адначасова пагадненне вызначае парадак увядзення маркіроўкі: альбо на тэрыторыі ўсяго саюза, альбо на нацыянальным узроўні (толькі пасля разгляду Саветам ЕЭК прапановы аб увядзенні маркіроўкі на ўсёй тэрыторыі саюза і ў выпадку, калі Саветам ЕЭК не прынята аднагалоснага рашэння аб увядзенні маркіроўкі на тэрыторыі ЕАЭС), альбо на тэрыторыі дзвюх і больш дзяржаў-членаў пры наяўнасці дамоўленасці ўвядзення па адзіных правілах.-0-
