31 кастрычніка, Рэчыца /Кар. БЕЛТА/. Рост заработнай платы павінен быць увязаны з ростам прадукцыйнасці працы. Гэту задачу актуалізаваў прэм'ер-міністр Сяргей Румас, наведваючы сёння прадпрыемствы дрэваапрацоўкі ў Рэчыцы, перадае карэспандэнт БЕЛТА.
Кіраўніку ўрада далажылі аб рэалізацыі двух інвестпраектаў у райцэнтры: "Рэканструкцыя і развіццё дзеючых вытворчасцей з укараненнем комплексу энергазберагальных мерапрыемстваў, арганізацыя вытворчасці драўняна-валакністых пліт МДФ/ХДФ у ААТ "Гомельдрэў", а таксама "Мадэрнізацыя вытворчасці ДСП у ААТ "Рэчыцадрэў".
На заводзе МДФ ААТ "Гомельдрэў" было адзначана, што прадпрыемства набірае абароты. У асноўным прадукцыя адгружаецца ў Польшчу, Украіну, прапрацоўваецца выхад і на іншыя рынкі. Асвойваюцца новыя напрамкі, напрыклад, выпуск ламінату 33-га класа (цяпер упор зроблены на 32-і клас).
У сярэднім за дзевяць месяцаў прадпрыемства працавала на 107 працэнтаў ад закладзеных вытворчых магутнасцей, у некаторыя месяцы на 114-115 працэнтаў. За студзень-верасень удалося атрымаць больш за Br81 млн выручкі. У той жа час рост заработнай платы апярэджвае рост прадукцыйнасці працы. У сувязі з гэтым прэм'ер-міністр звярнуў увагу на неабходнасць захавання суадносін тэмпаў росту прадукцыйнасці працы і зарплаты.
Сяргей Румас узняў і тэму зніжэння затрат на вытворчасці. Як было растлумачана, за два гады на прадпрыемстве ўкаранілі некалькі тэхнічных комплексаў, што дало магчымасць толькі ў 2019-м сэканоміць 400 тыс. еўра. Напрыклад, аптымізаваны нормы па сыравіне, расходу клею, цеплавой і электрычнай энергіі і іншых пазіцыях.
Што датычыцца мадэрнізацыі вытворчасці ДСП у ААТ "Рэчыцадрэў", то цэх выйшаў на поўную загрузку ў жніўні. Прадукцыя запатрабавана, у тым ліку і на знешніх рынках. У цэлым на прадпрыемстве ўдзельная вага экспарту ў аб'ёме вытворчасці за 9 месяцаў перасягнула 81 працэнт.
Таксама пры абмеркаванні інвестпраектаў размова ішла аб брэндзіраванні прадукцыі, яе сабекошце, закупачнай вартасці матэрыялаў, забеспячэнні фанернай сыравінай у 2020 годзе і іншых аспектах.
У Добрушы прадметам абмеркавання стала тэхнічнае перааснашчэнне філіяла "Добрушская папяровая фабрыка "Герой працы" ААТ "Кіруючая кампанія холдынга "Беларускія шпалеры" і арганізацыя вытворчасці мелаваных і немелаваных відаў кардону.
У праграме рабочай паездкі таксама наведванне Петрыкава, дзе прэм'ер-міністр азнаёміцца з рэалізацыяй інвестпраекта па прамысловай распрацоўцы Петрыкаўскага радовішча калійных солей з будаўніцтвам і ўводам у эксплуатацыю ў Гомельскай вобласці горна-абагачальнага комплексу магутнасцю не менш як 1,5 млн т хларыду калію ў год.-0-
