4 мая, Мінск /Кар. БЕЛТА/. Барацьба з пандэміяй не павiнна прывесці да разрыву кааперацыйных сувязей, спынення міжнароднага гандлю і спынення інвестыцыйнай дзейнасці, заявіў прэм'ер-міністр Беларусі Сяргей Румас сёння на саміце Кантактнай групы Руху недалучэння "Аб'яднаўшыся супраць COVID-19". Ён прыняў удзел у мерапрыемстве па даручэнні Прэзідэнта, паведамілі карэспандэнту БЕЛТА ў прэс-службе.
"Нельга дапусціць, каб барацьба з пандэміяй COVID-19 прывяла да разрыву напрацаваных кааперацыйных сувязей і сталых ланцугоў паставак, да спынення міжнароднага гандлю, да спынення інвестыцыйнай дзейнасці. Урад Беларусі прымае ўсе неабходныя меры па прадухіленні распаўсюджвання каранавіруса. Не менш увагі мы ўдзяляем аператыўнаму прыняццю разлічаных на перспектыву стратэгічных рашэнняў, якія дазволяць хутка аднавіць эканамічную актыўнасць пасля пандэміі", - запэўніў Сяргей Румас.
Ён падкрэсліў: выключную важнасць мае падтрымка грамадзян за кошт мер па ўмацаванні сацыяльных гарантый, павышэнні даступнасці медыцынскай дапамогі, удасканаленні сістэмы аховы здароўя, актывізацыі навуковых даследаванняў у галіне распрацоўкі сродкаў прафілактыкі, дыягностыкі і лячэння інфекцыі. "Дзяржавы - члены Руху недалучэння павінны прадэманстраваць сваю рашучасць пакінуць убаку палітычныя і эканамічныя рознагалоссі і аб'яднаць намаганні ў барацьбе з каранавіруснай інфекцыяй. Гэта важны момант, калі міжнародныя арганізацыі здольны і абавязаны на справе даказаць сваю неабходнасць і карыснасць", - дадаў прэм'ер-міністр.
У прыватнасці, Рух недалучэння як адна з самых шматлікіх і прадстаўнічых шматбаковых платформ узаемадзеяння прызначана стаць увасабленнем міжнароднай салідарнасці ў барацьбе з каранавіруснай пандэміяй, лічыць ён. "Менавіта ад калектыўных дзеянняў дзяржаў і іх з'яднанасці будзе залежаць тое, наколькі эфектыўна яны змогуць знізіць маштабы негатыўных праяў пандэміі. Кожная краіна выпрацоўвае свае рашэнні і формы рэагавання, але разам мы можам зрабіць больш. Калі мы не аб'яднаем намаганні, то заўтра будзем аднаўляць парушаныя эканамічныя сувязі, і на гэта пойдзе шмат часу, грошай і намаганняў", - сказаў Сяргей Румас.
Таксама ён адзначыў, што Беларусь салідарна з заклікамі Генеральнага сакратара ААН Антоніу Гутэрыша аб неабходнасці каардынацыі намаганняў устаноў ААН для аказання падтрымкі ўсім закранутым краінам, асабліва найменш абароненым перад пандэміяй. "Беларусь выказвае падтрымку Сусветнай арганізацыі аховы здароўя, прызнаючы яе вядучую ролю ў глабальнай сістэме мер рэагавання на каранавірусную пандэмію. Мы ўдзячны арганізацыі за экспертную дапамогу ў рамках місіі, якая наведала нашу краіну з 8 па 11 красавіка. Упэўнены, што выбранне Беларусі ў склад выканаўчага савета СААЗ на перыяд 2021-2024 гадоў стане важным укладам нашай краіны ў вырашэнне міжнародных праблем у ахове здароўя", - заявіў прэм'ер.
Беларусь выступае за даступнасць для ўсіх будучай вакцыны супраць каранавіруса, заклікае прыняць меры па прадухіленні спекуляцыі і празмернага накаплення запасаў лякарстваў, тавараў, сродкаў індывідуальнай абароны і медыцынскага абсталявання, неабходнага для барацьбы з COVID-19, і гатова ўзаемадзейнічаць з усімі краінамі на аснове прынцыпу ўзаемапавагі і дыялогу, запэўніў Сяргей Румас.-0-
