13 снежня, Мінск /Кар. БЕЛТА/. Штотыднёвыя гандлёвыя сесіі па рэалізацыі палімераў і вырабаў з іх для беларускіх спажыўцоў будуць арганізаваны на Беларускай універсальнай таварнай біржы з 5 студзеня 2023 года, паведамілі БЕЛТА ў прэс-службе БУТБ.
Таргі будуць праводзіцца па прынцыпе адваротнага аўкцыёну - на паніжэнне цаны, пры гэтым на біржавой пляцоўцы можна будзе набыць як прадукцыю айчынных вытворцаў, так і замежныя аналагі. "Падчас падрыхтоўкі да таргоў ужо складзены пералік амаль з 450 патэнцыяльных прадаўцоў і пакупнікоў, з якімі цяпер вядзецца кропкавая работа", - сказалі ў прэс-службе.
Як правіла, на сесійнай аснове рэалізуюцца тавары павышанага попыту, спажыванне якіх мае рэгулярны характар і патрабуе рытмічнасці паставак. Менавіта да гэтай катэгорыі і адносяцца палімеры і вырабы з іх. Прычым на біржавой пляцоўцы плануецца прадаваць самыя хадавыя пазіцыі. Перш за ўсё гэта палімеры ў першасных формах, такія як поліэтылен, полістырол, поліамід і полівінілхларыд, а таксама розныя віды палімернай плёнкі і ўпаковачных матэрыялаў - кантэйнераў, латкоў, мяшкоў, пакетаў, абалонак і іншай запатрабаванай прадукцыі.
"Такім чынам, беларускія прадпрыемствы шэрага галін атрымаюць магчымасць закупляць увесь неабходны ім асартымент палімераў і палімерных вырабаў у рамках адной біржавой гандлёвай сесіі. Таму акрамя эканоміі сродкаў за кошт зніжэння стартавых цэн у ходзе таргоў пакупнікам таксама не давядзецца шукаць пастаўшчыкоў, скажам, парніковай плёнкі і ПЭТ-бутэлек, паколькі і тыя, і іншыя будуць шырока прадстаўлены на біржавой пляцоўцы", - звярнулі ўвагу ў БУТБ.
На пачатковым этапе плануецца праводзіць па дзве гандлёвыя сесіі ў тыдзень, аднак у залежнасці ад патрэбнасцей пакупнікоў перыядычнасць таргоў будзе карэкціравацца ў большы або меншы бок. Таргі палімерамі і вырабамі з іх будуць праводзіцца ў секцыі перспектыўных біржавых тавараў БУТБ, абарот якой па выніках 11 месяцаў 2022 года склаў Br103,3 млн, або на 84 працэнты больш, чым за той жа перыяд 2021 года.
ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
