13 мая, Мінск /Кар. БЕЛТА/. Намеснік міністра эканомікі Сяргей Міцянскі расказаў сёння журналістам аб мерах па падтрымцы бізнесу ва ўмовах санкцый, перадае карэспандэнт БЕЛТА.
Пры мясцовых і рэспубліканскіх органах дзяржкіравання створаны грамадска-кансультатыўныя саветы, саветы па развіцці прадпрымальніцтва, на якіх разглядаюцца пытанні бізнесу. "Што датычыцца нарматыўнай падтрымкі, прыняты ўжо ўказ Прэзідэнта нумар 93 "Аб дадатковых мерах па забеспячэнні стабільнага функцыянавання эканомікі", пастанова Савета Міністраў нумар 180 і іншыя дакументы, асноўны з якіх - комплексны план мер па падтрымцы эканомікі. Гэта такая дарожная карта, якая была зацверджана на ўзроўні ўрада, каб процістаяць санкцыйнаму націску. Цяпер органы дзяржкіравання прымаюць адпаведныя нарматыўныя прававыя акты, рыхтуюць законапраекты, каб рэалізаваць гэту дарожную карту. Вядома, гэта не апошнія меры, якія будуць прыняты на ўзроўні ўрада. Мы гатовы слухаць бізнес, збірацца, каб у далейшым прымаць неабходныя рашэнні. Будзем аператыўна рэагаваць на ўсе выпады заходніх суседзяў адпаведнымі мерамі", - заявіў Сяргей Міцянскі.
Пры Савеце Міністраў створаны аператыўны штаб, які разглядае прапановы па падтрымцы бізнесу. "Калі гэта не патрабуе выдання нарматыўнага прававога акта, то меры рэагавання прымаюцца ў самыя кароткія тэрміны. Калі дакумент неабходны, значыць, даецца даручэнне адпаведным органам дзяржкіравання, якія яго рыхтуюць", - адзначыў намеснік міністра.
"Мы чакаем, што дзякуючы прынятым мерам па выніках года наша эканоміка застанецца ўстойлівай. Нашы людзі не павінны адчуць уплыў санкцый. Як органы кіравання, так і бізнес павінны сумесна забяспечыць і захаваць сацыяльныя гарантыі для грамадзян", - падкрэсліў Сяргей Міцянскі.-0-
