28 мая, Мінск /Кар. БЕЛТА/. У Беларусі рашэнне аб непрыняцці строгіх каранцінных мер у сувязі з COVID-19 было прадуманым. Такое меркаванне выказаў карэспандэнту БЕЛТА Надзвычайны і Паўнамоцны Пасол Беларусі ў Латвіі Васіль Марковіч.
"Спрачацца аб тым, што пандэмія негатыўна паўплывала на эканоміку практычна ўсіх краін, не даводзіцца. Гэта так. Але трэба прызнаць і сумленна сказаць, што сітуацыя ў гэтым плане ў Беларусі кардынальна адрозніваецца. Рашэнне аб непрыняцці строгіх каранцінных мер і не закрыцці беларускіх прадпрыемстваў у гэтых умовах было, на мой погляд, прадуманым, як з эканамічнага пункту гледжання, так і сацыяльнага", - лічыць дыпламат.
Васіль Марковіч падкрэсліў, што ў Беларусі сканцэнтраваны прадпрыемствы з вялікімі працоўнымі калектывамі, некаторыя з бесперапыннымі тэхналагічнымі працэсамі вытворчасці, некаторыя з іх - горадаўтваральныя. "Я не магу ўявіць сабе, каб усе яны спыніліся. Людзі захавалі рабочыя месцы, заработную плату, а значыць, мелі магчымасць забяспечваць сем'і і дапамагаць пажылым бацькам", - адзначыў ён.
Гаворачы аб выхадзе з існуючай крызіснай сітуацыі, пасол лічыць, што ўсё будзе залежаць ад таго, наколькі захаваліся гандлёва-эканамічныя ланцужкі з партнёрамі і заказчыкамі прадукцыі беларускіх прадпрыемстваў, наколькі хутка страчаныя кантакты будуць адноўлены і наколькі аператыўна будуць асвоены новыя рынкі збыту. "Вось тут дапамога беларускіх дыппрадстаўніцтваў будзе неацэннай", - падкрэсліў Васіль Марковіч.
Пасольства Беларусі ў Латвіі ў сваю чаргу актыўна ўключаецца ў работу з партнёрамі, паколькі каранцінныя меры ў гэтай краіне паступова адмяняюцца. "Дыпламаты ўжо засумавалі па прамых сустрэчах з калегамі, прадстаўнікамі бізнесу і беларускіх суполак, землякамі", - расказаў пасол.
Што датычыцца экспарту беларускай прадукцыі ў Латвію, то, нягледзячы на складаную сітуацыю ў сусветнай эканоміцы з-за каранавіруса, беларускія экспарцёры стараюцца нарошчваць пастаўкі сваіх тавараў на гэты рынак. Так, у студзені-сакавіку гэтага года беларускі экспарт тавараў у Латвію склаў $63,8 млн. Без уліку аб'ёмаў нафты, нафтапрадуктаў, нафтавых газаў і іншых газападобных вуглевадародаў, фарбаў і лакаў, антыдэтанатараў, антыаксідантаў, інгібітараў, загушчальнікаў, калійных і азотных угнаенняў, экспарт скараціўся на $3,6 млн і склаў $62,5 млн.
"Разам з тым істотна павялічыліся экспартныя пастаўкі асобных відаў беларускіх тавараў. Напрыклад, у 8,7 раза павялічыўся экспарт рапсавага алею, у 7,6 - поліамідаў, у 6,8 - соевага алею, у 6,4 - неапрацаванага алюмінію, у 6,1 - калійных угнаенняў. У разы ўзраслі пастаўкі беларускага цэменту і бандарнай драўніны. Павялічыўся экспарт ізаляваных правадоў, паліўнай драўніны і іншай прадукцыі. Наша пасольства таксама шукае новыя нішы, якія маглі б запоўніць беларускія тавары", - адзначыў кіраўнік дыппрадстаўніцтва.-0-
