17 сакавіка, Мінск /Кар. БЕЛТА/. У 2023 годзе галоўнай мэтай для прадпрыемстваў сістэмы Міністэрства прамысловасці Беларусі стане ўмацаванне дынамікі развіцця галіны. Аб гэтым заявіў міністр прамысловасці Аляксандр Рагожнік, каменціруючы вынікі работы прадпрыемстваў у бягучым годзе, паведамілі карэспандэнту БЕЛТА ў прэс-службе Мінпрама.
"Мінулы год для нашай прамысловасці стаў вельмі насычаным і ў многім паказальным: нягледзячы на ўсе складанасці, прадпрыемствы прадэманстравалі нядрэнныя вынікі і ўстойлівасць. Таму ў 2023 годзе галоўнай мэтай для прадпрыемстваў сістэмы Міністэрства прамысловасці Беларусі стане ўмацаванне дынамікі развіцця галіны і пераход да новага этапу развіцця прамысловасці. Гэта значыць нашы прамысловыя прадпрыемствы пасля перыяду ўвядзення беспрэцэдэнтных санкцый і сыходу замежных пастаўшчыкоў завершаць у бліжэйшай перспектыве працэс перабудовы і фарміравання так званага імпартазамешчанага аблічча беларускай прамысловасці", - падкрэсліў Аляксандр Рагожнік.
Паводле яго слоў, на 2023-2025 гады канструктарскія і тэхналагічныя службы прадпрыемстваў вызначылі каля 1 тыс. мерапрыемстваў па замяшчэнні імпартных вырабаў з эканамічным эфектам каля $400 млн.
У цэлым, паводле ацэнкі кіраўніка ведамства, у пачатку бягучага года сістэма Міністэрства прамысловасці паказвае высокія вынікі: аб'ём прамысловай вытворчасці за студзень - люты склаў каля Br4,3 млрд, тэмп росту ў супастаўных цэнах - 108 працэнтаў. Рэнтабельнасць продажаў у прамысловасці па Мінпраму за студзень склала 8,5 працэнта. Забяспечваецца прыбытковая работа галіны.
Сальда знешняга гандлю таварамі Мінпрама за студзень 2023 года склалася дадатным у памеры $231,4 млн. Тэмп росту экспарту тавараў арганізацый Мінпрама за студзень перавысіў 110 працэнтаў. Павялічаны экспарт у краіны СНД (тэмп росту экспарту 144,2 працэнта), у тым ліку ў Расійскую Федэрацыю (160,2 працэнта), у Казахстан (165 працэнтаў), ва Узбекістан (229,1 працэнта), у Таджыкістан (107,7 працэнта). Таксама назіраецца рост паставак у Азію (у 1,4 раза).-0-
