3 лютага, Масква /Эдуард Півавар - БЕЛТА/. Еўразійскі міжурадавы савет, пасяджэнне якога прайшло 2-3 лютага ў Алматы з удзелам прэм'ер-міністра Беларусі Рамана Галоўчанкі, зацвердзіў правілы доступу да паслуг па міждзяржаўнай перадачы электрычнай энергіі (магутнасці) у рамках агульнага электраэнергетычнага рынку ЕАЭС. Аб гэтым карэспандэнту БЕЛТА паведамілі ў прэс-службе Еўразійскай эканамічнай камісіі.
На брыфінгу па выніках пасяджэння афіцыйны прадстаўнік ЕЭК Ія Малкіна адзначыла, што ЕАЭС прадаўжае працэс лібералізацыі агульнага энергарынку. У 2017 годзе кіраўнікамі дзяржаў была прынята канцэпцыя фарміравання агульнага электраэнергетычнага рынку ЕАЭС і адпаведная праграма. "Тым не менш, каб забяспечыць гандаль электраэнергіяй, патрабавалася прыняцце яшчэ шэрага дакументаў у рамках права саюза, якія сёння ў тым ліку абмяркоўваліся, - сказала яна. - Мы спадзяёмся, што гэтыя дакументы, якія былі сёння прыняты, дадуць магчымасць забяспечыць гандаль электраэнергіяй на агульным рынку. Для гэтага мы плануем на першым этапе задзейнічаць існуючыя пляцоўкі Беларусі, Расіі і Казахстана".
Зацверджаныя прэм'ер-міністрамі правілы - першыя ў пакеце, неабходным для запуску агульнага электраэнергетычнага рынку. Яны забяспечваюць недыскрымінацыйны доступ да транзіту электраэнергіі пры гандлі ёю на агульным электраэнергетычным рынку ЕАЭС, а таксама неабходныя ўмовы для надзейнага функцыянавання нацыянальных рынкаў электраэнергіі.
Дакумент уступіць у сілу 1 студзеня 2025 года адначасова з правіламі ўзаемнага гандлю электраэнергіяй, правіламі вызначэння і размеркавання прапускной здольнасці міждзяржаўных ЛЭП і правіламі інфармабмену на агульным электраэнергетычным рынку. З увядзеннем у дзеянне ўсіх гэтых актаў пачне функцыянаваць агульны рынак электраэнергіі ЕАЭС.-0-
