5 сакавіка, Мінск /Кар. БЕЛТА/. Працэнты па крэдытах дрэваапрацоўчых і цэлюлозна-папяровых прадпрыемстваў у 2020 годзе выплацяць з бюджэту. Адпаведная пастанова Савета Міністраў ад 3 сакавіка 2020 года нумар 129 афіцыйна апублікавана сёння на Нацыянальным прававым інтэрнэт-партале, паведамляе БЕЛТА.
Міністэрству фінансаў даручана за кошт рэспубліканскага бюджэту забяспечыць пакрыццё часткі працэнтаў за карыстанне крэдытамі, прадастаўленымі арганізацыям дрэваапрацоўчай і цэлюлозна-папяровай прамысловасці для рэалізацыі інвестыцыйных праектаў і папаўнення абаротных сродкаў, а таксама часткі некаторых расходаў.
Размова ідзе аб прадпрыемствах ААТ "Гомельдрэў", ААТ "Івацэвічдрэў", ААТ "Мастоўдрэў", ААТ "Рэчыцадрэў", ААТ "Светлагорскі цэлюлозна-кардонны камбінат", РУП "Завод газетнай паперы".
Атрыманыя сродкі накіроўваюцца арганізацыямі ў 2020-2021 гадах на папаўненне ўласных абаротных сродкаў.
Канцэрну "Беллеспаперапрам" разам з Дзяржкаммаёмасцю трэба будзе да 1 красавіка 2021 года ўнесці праекты нарматыўных прававых актаў аб павелічэнні долі Рэспублікі Беларусь у статутных фондах гаспадарчых таварыстваў на сумы аказанай ім дзяржпадтрымкі.-0-