26 жніўня, Чалпон-Ата /Кар. БЕЛТА/. Прэм'ер-міністр Беларусі Раман Галоўчанка сёння ў размове з журналістамі падвёў вынікі пасяджэння Еўразійскага міжурадавага савета, перадае карэспандэнт БЕЛТА.
"Мы вельмі прадметна і дакладна акцэнтавалі пазіцыю Беларусі адносна далейшых шляхоў развіцця саюза. Этап барацьбы з бар'ерамі, перашкодамі ў гандлі ўжо заканчваецца. Фактычна рынак свабоднага гандлю функцыянуе. Трэба цяпер глядзець на перспектыву. Мы павінны пераходзіць ад гандлёвага саюза да эканамічнага, прамысловага. Трэба рэалізоўваць сумесныя прамысловыя праекты. Засталіся вытворчыя сувязі, з'явіліся новыя вытворчасці і тэхналогіі. Трэба ствараць сумесныя скразныя прадукты", - сказаў Раман Галоўчанка.
Беларускі бок прапанаваў пілотны праект "Еўразійскі электробус". "Павінна быць дакладная вытворчая праграма. Мы бачым разуменне ў нашых калег. Трэба знайсці інструменты фінансавання", - адзначыў ён.
Яшчэ адзін важны аспект праведзенага пасяджэння міжурадавага савета - заключэнне пагаднення аб заснаванні Еўразійскай перастраховачнай кампаніі. "Гэта важна, паколькі наш рынак даволі вузкі. Вельмі сур'ёзныя праекты мы раней маглі страхаваць на Захадзе, але яны ўвялі санкцыі. Дзякуючы новаму пагадненню ў нас з'яўляецца магчымасць ажыццяўляць перастрахаванне адказнасці нашых страхоўшчыкаў ужо ў рамках ЕАЭС", - звярнуў увагу прэм'ер-міністр.
Акрамя таго, узгоднены і падпісаны пералік інфраструктурных праектаў. "Гэта важна, паколькі пытанне трансфармацыі лагістычных ланцужкоў - гэта пытанне выжывання. Мы вызначылі праекты, якія кожная краіна будзе рэалізоўваць паасобку. Для Беларусі гэта рэканструкцыя аўтадарог М1 і М10, яны будуць спалучацца з еўразійскімі транспартнымі калідорамі. Не павінна быць вузкіх месцаў, кожны будзе рабіць сваю частку работы. Мы павінны забяспечыць устойлівыя сухапутныя калідоры ў напрамку Паўднёвай Азіі і Кітая", - адзначыў кіраўнік беларускага ўрада.-0-
