28 красавіка, Масква /Эдуард Півавар - БЕЛТА/. Калегія Еўразійскай эканамічнай камісіі прыняла рашэнне аб стварэнні рабочай групы па распрацоўцы праграмы сумесных дзеянняў краін Еўразійскага эканамічнага саюза ў сферы абароны правоў спажыўцоў і забеспячэнні якасці тавараў і паслуг, паведамілі БЕЛТА ў прэс-службе ЕЭК.
"Падрыхтоўка праграмы сумесных дзеянняў па абароне правоў спажыўцоў прадугледжана стратэгічнымі напрамкамі развіцця еўразійскай інтэграцыі да 2025 года, - адзначылі ў ЕЭК. - Асноўная мэта праграмы - стварэнне ў ЕАЭС эфектыўнага механізма правядзення ўзгодненай палітыкі ў сферы абароны правоў спажыўцоў і рэалізацыі прынцыпу іх роўнай прававой абароны".
У рабочую групу ўвойдуць прадстаўнікі дзяржаўных органаў і грамадскіх арганізацый спажыўцоў краін ЕАЭС. "Падрыхтоўку праекта праграмы плануецца завяршыць да канца 2021 года, прыняцце дакумента намечана на 2022 год", - дадалі ў ЕЭК.-0-