6 кастрычніка, Мінск /Кар. БЕЛТА/. Прадпрыемствы Варонежскай вобласці плануюць праз Беларускую ўніверсальную таварную біржу пастаўляць у Беларусь імпартазамяшчальныя тавары. Аб гэтым паведамілі БЕЛТА ў прэс-службе БУТБ.
Дамоўленасць аб выкарыстанні электроннай пляцоўкі Беларускай універсальнай таварнай біржы (БУТБ) для арганізацыі паставак у Беларусь імпартазамяшчальнай прадукцыі вытворчасці Варонежскай вобласці Расіі дасягнута па выніках бізнес-сустрэчы з варонежскімі прадпрымальнікамі, якая адбылася ў Мінскім аддзяленні Беларускай гандлёва-прамысловай палаты.
У прыватнасці, ТАА "Дэльта-пак" плануе прадаваць праз пляцоўку імпартазамяшчэння БУТБ шырокі асартымент упаковачных матэрыялаў для прадуктаў харчавання, бытавой хіміі і тавараў па доглядзе жывёл, а таксама поліэтыленавую плёнку пад друк і ламінацыю. Попыт на прадукцыю варонежскага прадпрыемства чакаецца высокі, паколькі на гэту катэгорыю тавараў прыпадае значная доля здзелак, якія заключацца на біржавой гандлёвай платформе.
Акрамя таго, аб намеры размясціць у электронным каталогу БУТБ заяўкі на продаж пад'ёмна-транспартнага абсталявання заявіла ТАА "Рускія кранавыя машыны". Плануецца, што выпускаемыя гэтай кампаніяй электрычныя маставыя краны будуць закупляцца акрэдытаванымі на БУТБ будаўнічымі арганізацыямі і прадпрыемствамі прамысловага сектара.
Зацікаўленасць у рабоце на беларускім рынку праз біржу таксама выказалі прадстаўнікі ТАА "НВА Перфаград" - аднаго з вядучых вытворцаў агароджаў, насцілаў, прабіўных рашот і іншай прадукцыі з перфараванага ліста ў Варонежскай вобласці. Прадпрыемства ўжо экспартуе сваю прадукцыю ў краіны ЕАЭС, а летам 2022 года адкрыла афіцыйнае прадстаўніцтва ў Беларусі. Пляцоўку БУТБ гэта кампанія разглядае ў якасці дадатковага канала збыту і крыніцы актуальнай цэнавай інфармацыі.-0-
