Прадпрыемствы Мінпрама ў першым паўгоддзі нарасцілі аб'ёмы вытворчасці прадукцыі больш як на 4 працэнты

25 ліпеня, Мінск /Кар. БЕЛТА/. Прадпрыемствы Мінпрама ў першым паўгоддзі нарасцілі аб'ёмы вытворчасці прадукцыі больш як на 4 працэнты. Аб гэтым расказаў першы намеснік міністра прамысловасці Аляксандр Агароднікаў у час выязнога пасяджэння калегіі Міністэрства прамысловасці на пляцоўцы ААТ "Мінскі маторны завод" з удзелам намесніка прэм'ер-міністра Пятра Пархомчыка, паведамілі карэспандэнту БЕЛТА ў прэс-службе Мінпрама.

Аляксандр Агароднікаў расказаў, што за першае паўгоддзе гэтага года Мінпрамам чакаецца выкананне практычна ўсіх даведзеных урадам паказчыкаў. Так, арганізацыі Мінпрама за студзень - чэрвень вырабілі прадукцыі на суму больш як Br15,8 млрд - тэмп росту склаў больш як 104 працэнты ў супастаўных цэнах да ўзроўню аналагічнага перыяду мінулага года.

Акрамя таго, перавыкананы аб'ём вытворчасці ў натуральным выражэнні па наступных таварных групах: ліфты ("Магілёўліфтмаш"), землявозы (БЕЛАЗ), аўтамабілі для перавозкі 10 і больш чалавек (МАЗ, "Белкамунмаш"), грузавыя аўтамабілі (МАЗ), легкавыя аўтамабілі (БЕЛДЖЫ), халадзільнікі/маразільнікі і пральныя машыны (АТЛАНТ).

Па выніках паўгоддзя, адзначыў Аляксандр Агароднікаў, выканана напружанае заданне па суадносінах запасаў гатовай прадукцыі і сярэднямесячнага аб'ёму вытворчасці - 81,3 працэнта. Паводле папярэдніх ацэнак, галіна спрацуе з чыстым прыбыткам і рэнтабельна - каля 8 працэнтаў.

На калегіі дадзена прынцыповая ацэнка кіраўнікам холдынгаў Мінпрама і прааналізаваны вынікі іх работы ў частцы аб'ёмаў выпуску прадукцыі і эфектыўнасці знешнеэканамічнай дзейнасці.

Вынікі работы галіны ў цэлым і знешнеэканамічнай дзейнасці за першае паўгоддзе абмеркавалі на калегіі амаль 150 чалавек - кіраўнікі прадпрыемстваў сістэмы Мінпрама з усёй краіны, цэнтральнага апарату міністэрства, а таксама прадстаўнікі шэрага ведамстваў і арганізацый краіны. Перад пачаткам калегіі Мінпрама генеральны дырэктар Мінскага маторнага завода Аляксандр Батвіннік азнаёміў віцэ-прэм'ера Пятра Пархомчыка і міністра прамысловасці Аляксандра Яфімава з выстаўкай рухавікоў і спецыяльнай тэхнікі прадпрыемства.

Аналізуючы вынікі знешнеэканамічнай дзейнасці, Пётр Пархомчык адзначыў, што маркетынгавыя службы прадпрыемстваў Мінпрама павінны праводзіць больш агрэсіўную палітыку па далейшым развіцці дзеючых кантактаў і пошуку новых кропак росту. Ён таксама звярнуў асаблівую ўвагу на неабходнасць забеспячэння комплекснага падыходу ў рабоце з усімі прадпрыемствамі, незалежна ад маштабу і аб'ёмаў вытворчасці, а таксама павышэння іх укладу ў агульны прамысловы вынік.-0-