1 снежня, Мінск /Кар. БЕЛТА/. Аб гатоўнасці выстаўляць на біржавыя таргі кандытарскія вырабы, упаковачныя матэрыялы і мэблю ўласнай вытворчасці заявілі прадстаўнікі расійскіх кампаній, якія наведвалі цэнтральны офіс Беларускай універсальнай таварнай біржы ў складзе бізнес-дэлегацыі Ленінградскай вобласці, паведаміў карэспандэнту БЕЛТА прэс-сакратар БУТБ Раман Яніў.
Візіт адбыўся пры садзейнічанні Гандлёвага прадстаўніцтва Расійскай Федэрацыі ў Беларусі і Цэнтра падтрымкі экспарту Ленінградскай вобласці.
Арганізаваць таргі названай прадукцыяй плануецца на электроннай В2В-пляцоўцы БУТБ, дзе паспяхова ўжо рэалізуюцца такія тавары. У прыватнасці, здзелкі па закупцы офіснай мэблі, прадуктаў харчавання і розных відаў упакоўкі праводзяцца практычна штотыднёва. Адной толькі шакаладнай глазуры за апошнія некалькі месяцаў прададзена на Br1 млн. Што датычыцца прадукцыі ленінградскіх вытворцаў, то патэнцыяльнымі пакупнікамі могуць стаць беларускія прадпрыемствы і арганізацыі дзяржаўнай формы ўласнасці, якія выкарыстоўваюць біржавую пляцоўку ў якасці альтэрнатывы традыцыйным закупачным працэдурам.
"Інтэлектуальны функцыянал біржавой В2В-пляцоўкі дае магчымасць у аўтаматычным рэжыме інфармаваць патэнцыяльных пакупнікоў аб з'яўленні новых заявак на продаж тавару, які яны набывалі ўжо раней. На практыцы гэта значыць, што пры размяшчэнні ў гандлёвай сістэме аферты ад ленінградскага вытворцы офісных крэслаў усе арганізацыі, якія заключалі здзелкі па закупцы аналагічнай мэблі, атрымаюць адпаведнае паведамленне. Таму для расіян гэта магчымасць без затрат на маркетынг устанавіць кантакт з мэтавай аўдыторыяй у Беларусі. У сваю чаргу беларускія спажыўцы атрымаюць доступ да прапаноў расійскіх заводаў-вытворцаў, што ў большасці выпадкаў дае магчымасць прыкметна эканоміць на закупцы", - адзначылі ў прэс-службе.
Цяпер на БУТБ акрэдытавана 296 суб'ектаў гаспадарання Ленінградскай вобласці, каля трэці з якіх рэгулярна ўдзельнічае ў таргах. Праз біржавую пляцоўку ў гэты рэгіён у асноўным пастаўляюцца партландцэмент і мяса-малочная прадукцыя, а закупляюцца пераважна вырабы з чорных металаў і вугаль.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
