29 снежня, Масква /Эдуард Півавар - БЕЛТА/. У Еўразійскім эканамічным саюзе прадоўжана абарачэнне медыцынскіх вырабаў, раней зарэгістраваных па нацыянальных правілах, паведамілі БЕЛТА ў прэс-службе Еўразійскай эканамічнай камісіі.
"Краіны Еўразійскага эканамічнага саюза завяршылі працэдуры падпісання пратакола аб унясенні змянення ў пагадненне аб адзіных прынцыпах і правілах абарачэння медыцынскіх вырабаў у ЕАЭС ад 23 снежня 2014 года, - адзначылі ў ЕЭК. - З 28 снежня гэтага года і да завяршэння ўсімі дзяржавамі працэдур ратыфікацыі запушчаны рэжым яго часовага прымянення. Змяненні прадугледжваюць, што медвырабы, раней зарэгістраваныя ў парадку, прадугледжаным нацыянальным заканадаўствам краін саюза, могуць выпускацца ў абарачэнне да заканчэння тэрміну дзеяння дакументаў, якія пацвярджаюць іх рэгістрацыю, і абарачацца на тэрыторыі гэтай дзяржавы. Унясенне змяненняў у рэгістрацыйныя дакументы такіх медыцынскіх вырабаў дапускаецца ў выпадку падачы адпаведнай заявы да 31 снежня 2026 года".
Змяненні накіраваны на плаўнае і натуральнае фарміраванне агульнага рынку медыцынскіх вырабаў у ЕАЭС, што дае магчымасць падтрымліваць забеспячэнне сістэм аховы здароўя дзяржаў саюза медыцынскімі вырабамі на належным узроўні. Адначасова забяспечваюцца ўстаноўленыя правам саюза патрабаванні да якасці, бяспекі і эфектыўнасці новаўводзімых медыцынскіх вырабаў.
"Пры гэтым з 1 студзеня 2022 года новыя медыцынскія вырабы будуць рэгістравацца толькі па правілах Еўразійскага эканамічнага саюза", - падкрэслілі ў ЕЭК.-0-
