22 кастрычніка, Масква /Эдуард Півавар - БЕЛТА/. Віцэ-прэм'ер Беларусі Ігар Петрышэнка лічыць, што ў Еўразійскім эканамічным саюзе неабходна папулярызаваць брэнды і пазбягаць пратэкцыянісцкіх мер. Аб гэтым ён заявіў сёння ў Ерэване на міжнародным форуме "Еўразійскі тыдзень", паведамілі БЕЛТА ў прэс-службе Еўразійскай эканамічнай камісіі (ЕЭК).
"У цэлым павінна быць сумленная канкурэнтная палітыка ў рамках саюза, каб нашы кампаніі ў цеснай кааперацыі ўзаемадзейнічалі на рынку ЕАЭС і папулярызавалі наш агульны брэнд на знешніх рынках", - сказаў Ігар Петрышэнка. У якасці прыкладаў агульных брэндаў ён назваў такія буйныя прадпрыемствы Беларусі, як МТЗ, МАЗ, БелАЗ, якія выпускаюць прадукцыю ў цеснай кааперацыі з расійскімі партнёрамі.
Пленарнае пасяджэнне форуму адкрылася з удзелам выконваючага абавязкі прэм'ер-міністра Арменіі Нікола Пашыняна, старшыні Калегіі ЕЭК Тыграна Саркісяна, высокапастаўленых прадстаўнікоў краін ЕАЭС. Узнімаліся пытанні дасягненняў дзяржаў - членаў ЕАЭС у стварэнні спрыяльнага бізнес-клімату, абмяркоўваліся меры, накіраваныя на яго далейшае ўдасканаленне і ўмацаванне вытворчых сувязей.
Першы віцэ-прэм'ер - міністр фінансаў Расіі Антон Сілуанаў заклікаў калег паляпшаць бізнес-клімат разам. "Чым больш мы будзем прымаць такіх агульных, адзіных нарматыўных актаў, якія ўключаюць у сябе лепшыя практыкі, тым лепшыя ўмовы для прадпрымальніцтва мы створым", - заявіў ён.
Першы намеснік прэм'ер-міністра Казахстана Аскар Мамін звярнуў увагу на тое, што ў ЕАЭС адной з галоўных задач з'яўляецца прадухіленне наступстваў прагназуемага запаволення эканамічнага росту. У ЕЭК ужо сфарміраваны 14 прамысловых платформ і больш за 100 праектаў, рэалізацыя якіх дасць магчымасць мінімізаваць магчымыя негатыўныя эфекты.
Форум "Еўразійскі тыдзень", які прадоўжыцца да 24 кастрычніка, складаецца з выставачнай і дзелавой частак. У выставачнай частцы прадстаўлены прадукты перапрацоўкі сельскай гаспадаркі, фармацэўтыкі, лёгкай прамысловасці, будматэрыялы, ювелірнай вытворчасці.
Буйнейшы міжнародны форум на прасторы саюза сабраў звыш 2,5 тыс. удзельнікаў з 25 краін. На дзелавых мерапрыемствах выступяць 160 спікераў з Беларусі, Расіі, Арменіі, Афганістана, Венгрыі, Германіі, Грузіі, Ірана, Італіі, Казахстана, Камбоджы, Кыргызстана, Кітая, Літвы, Малдовы, Нігерыі, Нідэрландаў, ААЭ, Вялікабрытаніі, ЗША, Таджыкістана, Узбекістана, Швейцарыі, Катара, Францыі, Аргенціны, Іспаніі, Украіны. Дзелавая праграма "Еўразійскага тыдня" прадугледжвае тры трэкі: стратэгічны - з абмеркаваннем пытанняў будучага развіцця саюза; галіновы - прысвечаны кааперацыі ў прыярытэтных галінах; і бізнес-трэк - з акцэнтам на ўзаемадзеянні буйнога, сярэдняга і малога бізнесу ЕАЭС.
Форум "Еўразійскі тыдзень" - штогадовае мерапрыемства, якое праводзіцца краінамі ЕАЭС і Еўразійскай эканамічнай камісіяй. Упершыню форум адбыўся ў кастрычніку 2016 года ў Маскве. Другі форум прайшоў у жніўні 2017 года ў Астане.-0-
