29 снежня, Мінск /Кар. БЕЛТА/. Тавараабарот Беларусі і Пскоўскай вобласці павялічыўся больш як на 40 працэнтаў. Аб гэтым паведаміў сёння намеснік прэм'ер-міністра Ігар Петрышэнка на пасяджэнні рабочай групы па супрацоўніцтве Беларусі і Пскоўскай вобласці ў фармаце відэаканферэнцыі, перадае карэспандэнт БЕЛТА.
"Планы, якія мы намячалі на бягучы год, выкананы. У студзені-кастрычніку тавараабарот Беларусі і Пскоўскай вобласці склаў больш за $122 млн і ў параўнанні з аналагічным перыядам мінулага года павялічыўся на 40,8 працэнта, экспарт - $74,8 млн, узрос на 41 працэнт", - сказаў Ігар Петрышэнка.
Сёння на пасяджэнні бакі разгледзяць шырокі спектр пытанняў, звязаных з пастаўкай беларускай тэхнікі - трактароў, дарожна-будаўнічай тэхнікі, аўтобусаў на газаматорным паліве і г.д. "Мы адпрацоўваем розныя падыходы, формы ўзаемадзеяння, каб павялічыць аб'ёмы паставак нашай тэхнікі", - адзначыў ён.
Віцэ-прэм'ер расказаў, што беларускія будаўнікі будуць удзельнічаць у праектах па ўзвядзенні аб'ектаў сацыяльнай інфраструктуры ў Пскоўскай вобласці. "Мы выходзім на генпадрад па будаўніцтве школы на 825 месцаў у горадзе Гдове. Гэта вельмі добры праект. Мы яго якасна рэалізуем разам з пскоўскімі калегамі. Вопыт у нас ёсць", - дадаў Ігар Петрышэнка.
Акрамя таго, Беларусь і Пскоўская вобласць актыўна ўзаемадзейнічаюць у сферы аграпрамысловага комплексу. "У прыватнасці, абменьваемся падыходамі па вырошчванні розных культур, супрацоўнічаем па пастаўках харчовай групы тавараў. Таксама падключаем нашу навуку - Нацыянальную акадэмію навук, рэспубліканскія навукова-практычныя цэнтры па розных напрамках", - сказаў намеснік прэм'ер-міністра.
У час пасяджэння вялікая ўвага будзе ўдзелена гуманітарным аспектам. У прыватнасці, прамым кантактам паміж маладзёжнымі арганізацыямі, супрацоўніцтву ў сферы адукацыі, культуры, навукі, спорту, турызму і інш. "Мы прааналізуем, як ажыццяўлялася супрацоўніцтва з нашай прыгранічнай Віцебскай вобласцю. Яна больш актыўна завязана на ўзаемадзеянні з Расіяй па шырокім спектры пытанняў", - канстатаваў ён.
У парадку дня таксама пытанні транспартных зносін, у першую чаргу авіяцыйных. "Думаю, у наступным годзе для нашых пскоўскіх сяброў будзе адкрыты прамы рэйс у Мінск. Мы паглядзім па лагістыцы, магчыма, і ў іншыя абласныя цэнтры таксама", - дадаў Ігар Петрышэнка.
"Упэўнены, дасягнутыя дамоўленасці нададуць новы імпульс нашым партнёрскім сувязям, будуць садзейнічаць далейшаму развіццю плённага ўзаемадзеяння паміж Беларуссю і Пскоўскай вобласцю", - рэзюмаваў намеснік прэм'ер-міністра.
Губернатар Пскоўскай вобласці Міхаіл Вядзернікаў адзначыў: для расійскага рэгіёна Беларусь - адзін з ключавых знешнегандлёвых партнёраў. Гэтаму садзейнічае як геаграфічнае становішча, так і цесныя гістарычныя сувязі прыгранічных тэрыторый. "Значную долю абласнога экспарту складае высокатэхналагічная прадукцыя - рухавікі для БелАЗа, электраабсталяванне для МТЗ, азотныя ўстаноўкі для "Белакрыа", высакавольтная апаратура і газавае абсталяванне. Беларусь пастаўляе ў Пскоўскую вобласць малочную прадукцыю, абсталяванне і механічныя ўстройствы, - сказаў ён. - Для нас гэта вельмі важна, мы гатовы рабіць усё неабходнае для далейшага развіцця тавараабароту вобласці і рэспублікі".
Паводле слоў губернатара, нягледзячы на ўсе цяжкасці эпідсітуацыі і звязаныя з ёю абмежаванні, расійскі рэгіён прадаўжае цесна супрацоўнічаць з беларускімі падрадчыкамі ў сферы будаўніцтва. Актыўна развіваецца і ўзаемадзеянне па лініі мадэрнізацыі сістэмы ЖКГ Пскоўскай вобласці.
"Патэнцыял супрацоўніцтва не вычарпаны. Агульнымі намаганнямі мы павінны зрабіць усё, каб рэалізаваць яго на карысць людзей, якія жывуць па абодва бакі граніцы", - падкрэсліў Міхаіл Вядзернікаў.-0-
