26 жніўня, Мінск /Кар. БЕЛТА/. Беларусь зацікаўлена ў павелічэнні хуткасці руху тавараў у ЕАЭС і пры гандлі з трэцімі краінамі. Аб гэтым заявіў сёння журналістам намеснік прэм'ер-міністра Беларусі Ігар Петрышэнка, перадае карэспандэнт БЕЛТА.
Тэмы транспарту і лагістыкі абмяркоўваліся 25-26 жніўня ў Чалпон-Аце на пасяджэнні Еўразійскага міжурадавага савета. "Мы зацікаўлены ў павелічэнні хуткасці руху нашых тавараў на прасторы ЕАЭС, у тым ліку пры гандлі з трэцімі краінамі. Дзяржавы саюза сабралі пералік ключавых інтэграцыйных транспартна-лагістычных калідораў. Ад Беларусі ў пералік увайшлі два транспартныя калідоры - М1 і М10", - сказаў Ігар Петрышэнка.
Пытанні лагістыкі асабліва актуальныя для Беларусі ў сувязі з санкцыйным націскам. "Пастаўкі праз Расію значна павялічыліся ў сувязі з тым, што нашы заходнія суседзі ўвялі надуманыя абмежавальныя меры. У пераарыентацыі таварных патокаў удзельнічаюць і іншыя нашы партнёры па ЕАЭС. Акрамя таго, Азербайджан і Узбекістан таксама ўключыліся ў гэту работу. Для нас важна і асваенне новых рынкаў - краін Усходу, Афрыкі. Але патрэбны пэўны час на тое, каб перабудавацца. Дынамічна працуем над гэтым разам з нашымі партнёрамі", - адзначыў віцэ-прэм'ер.
На пасяджэнні міжурадавага савета абмяркоўваліся і пытанні прамысловай кааперацыі. "Важна рэалізацыя прапанаванага намі пілотнага праекта "Еўразійскі электробус". Мы правялі адпаведную падрыхтоўчую работу з пункту гледжання аналізу магчымасцей і кампетэнцый кампаній і прадпрыемстваў краін ЕАЭС", - падкрэсліў Ігар Петрышэнка.
Беларускі бок на пасяджэнні акцэнтаваў увагу на тым, што еўразійскія інстытуты развіцця - ЕАБР, ЕФСР - павінны больш актыўна ўключыцца ў работу па фінансаванні як інфраструктурных праектаў, так і праектаў у сферы прамысловай кааперацыі.
Акрамя таго, сёння было падпісана пагадненне аб заснаванні Еўразійскай перастраховачнай кампаніі. "Гэта было ініцыятывай Беларусі для таго, каб забяспечвалася фінансавая падтрымка сумеснаму прасоўванню тавараў, сумеснаму прадукту ЕАЭС на рынку трэціх краін. Вельмі важна мінімізаваць рызыкі, для гэтага і ствараецца такая арганізацыя", - растлумачыў віцэ-прэм'ер.-0-
