11 лістапада, Мінск /Кар. БЕЛТА/. Намеснік прэм'ер-міністра, член Савета Еўразійскай эканамічнай камісіі ад Беларусі Ігар Петрышэнка 12 лістапада прыме ўдзел у пасяджэнні Савета ЕЭК у рэжыме відэаканферэнцыі, паведамілі БЕЛТА ў прэс-службе ўрада.
У парадак дня ўключана 16 пытанняў. Плануецца разгледзець і зацвердзіць план мерапрыемстваў па рэалізацыі асноўных напрамкаў прамысловага супрацоўніцтва ў рамках Еўразійскага эканамічнага саюза да 2025 года. Праект плана змяшчае пэўныя мерапрыемствы, устанаўлівае парадак і тэрміны іх выканання, а таксама адказных выканаўцаў.
Таксама плануецца разгледзець унясенне змяненняў у патрабаванні да ўкаранення, падтрымання і ацэнкі сістэмы менеджменту якасці медыцынскіх вырабаў у залежнасці ад патэнцыяльнай рызыкі іх прымянення. Адпаведны праект рашэння Савета ЕЭК падрыхтаваны ў мэтах распрацоўкі механізмаў, якія даюць магчымасць праводзіць ацэнку сістэмы менеджменту якасці медыцынскіх вырабаў ва ўмовах санітарна-эпідэміялагічнай абстаноўкі, якая склалася ў свеце.
Акрамя таго, будзе разгледжана пытанне аб устанаўленні стаўкі ўвазной мытнай пошліны адзінага мытнага тарыфу Еўразійскага эканамічнага саюза ў дачыненні да аксідаў і гідраксідаў ванадыю. Увядзенне гэтай меры накіравана на павышэнне канкурэнтаздольнасці вырабленых прадпрыемствамі дзяржаў - членаў ЕАЭС ванадыевых лігатур і тытанавых сплаваў на іх аснове для авіякасмічнай галіны, павелічэнне аб'ёмаў іх вытворчасці і ўзроўню загрузкі вытворчых магутнасцей.
Таксама плануецца адобрыць праект пратакола аб унясенні змяненняў у Дагавор аб ЕАЭС ад 29 мая 2014 года ў частцы вызначэння парадку спагнання ўскосных падаткаў пры аказанні паслуг у электроннай форме і накіраваць яго ў дзяржавы-члены для правядзення ўнутрыдзяржаўных працэдур, неабходных для яго падпісання.
Па ініцыятыве беларускага боку будзе разгледжана пытанне аб распрацоўцы стратэгіі біялагічнай бяспекі Еўразійскага эканамічнага саюза. Неабходнасць распрацоўкі стратэгіі абумоўлена нарастаннем сацыяльна-эканамічнай і геапалітычнай значнасці негатыўнага ўплыву на жыццядзейнасць чалавека і навакольнае асяроддзе біялагічных пагроз на тэрыторыі ўсіх дзяржаў без выключэння.-0-