6 сакавіка, Мінск /Кацярына Крышэнік - БЕЛТА/. Перспектывы пашырэння прысутнасці беларускага бізнесу ў Індыі і інвестараў з гэтай краіны - у Беларусі абмеркавалі ўдзельнікі інвестыцыйнага форуму ў Нью-Дэлі. Аб гэтым карэспандэнту БЕЛТА паведамілі ў пасольстве Беларусі ў Індыі.
"Абмеркаваны перспектывы павелічэння беларуска-індыйскага тавараабароту, пашырэння прысутнасці беларускага бізнесу ў Індыі і індыйскіх інвестараў у Беларусі, у тым ліку ў зонах з прэферэнцыйным інвестыцыйным рэжымам, - расказалі ў дыпмісіі. - Бакі адзначылі наяўнасць істотнага патэнцыялу для рэалізацыі сумесных праектаў у сферы прамысловай кааперацыі, далейшага росту ўзаемнага гандлю, у тым ліку за кошт рэалізацыі ў Беларусі інвестыцыйных праектаў з удзелам індыйскага бізнесу".
Такі форум быў арганізаваны ўпершыню, ён праходзіў 4 і 5 сакавіка адначасова з 10-м пасяджэннем двухбаковай міжурадавай камісіі па супрацоўніцтве ў галіне гандлю, эканомікі, прамысловасці, навукі, тэхналогій і культуры.
Беларускую дэлегацыю на мерапрыемствах узначаліў сустаршыня беларускай часткі міжурадавай камісіі міністр прамысловасці Павел Уцюпін. Удзел у мерапрыемстве прынялі таксама кіраўнік дыпмісіі Андрэй Ржавускі, прадстаўнікі МЗС, Мінпрама і шэрага падведамных прадпрыемстваў, канцэрна "Белнафтахім", прадстаўніцтва Беларускай калійнай кампаніі ў Індыі, Рэспубліканскага саюза турыстычнай індустрыі.
На форуме адбылася прэзентацыя магчымасцей СЭЗ "Брэміна-Орша", інвестыцыйнага патэнцыялу Беларусі ў сферы турызму. Павел Уцюпін правёў сустрэчы з кіраўніцтвам міністэрстваў чыгунак, гандлю і прамысловасці, жыллёвага будаўніцтва і гарадскога развіцця. Па выніках падпісаны шэраг мемарандумаў аб супрацоўніцтве і камерцыйных кантрактаў.-0-
